1慘了，這流人血个城市！
全城充滿詐欺㧯強暴；
滿遍有人搶劫，毋識停。
2鞭聲嗶啪響！車輪𠾐𠾐滾！
戰馬猋像飛！戰車呯呯走！
3騎兵衝鋒，刀光劍影！
身屍堆山，屍骨無數；
人行挺動，就逕跌倒。
4妓女尼尼微愛受責罰；
姖打扮到靚靚來迷人。
姖个淫亂引誘列國；
姖行邪術欺騙萬族。
5上主 — 萬軍个元帥講：
尼尼微啊，𠊎係你个敵人；
𠊎愛掀你个裙仔，來幪你个面，
俾列國看到你赤身露體，
俾萬民看到你恁見笑。
6𠊎愛將屙糟東西豁在你身上，
恁樣羞辱你；
人愛目盯盯看等你。
7看到你个人嚇到打亂退。
佢等講：尼尼微荒掉了！
有麼人同情姖呢？
麼人肯安慰姖呢？
8 尼尼微啊，你有比埃及个首都底比斯較強麼？姖有一條河溝圍等姖，像城牆恁樣保護姖 — 尼羅河係姖个防備。
9古實㧯埃及係姖个力量；姖个權力無窮。弗㧯利比亞係姖个同盟國。
10總係底比斯个人民卻被人捉到外國去了。佢等个孲𤘅仔在街頭巷尾被人抨死；佢等个大官貴人被鐵鍊鎖等，被人用拈鬮來分配、然後帶走。
11 尼尼微啊，你也會醉到迷迷痴痴；你也會想愛閃你个敵人。
12你个城堡全部像無花果樹，滿滿熟水个果子，樹一搖，果子就跌落人个嘴孔肚！
13你个戰士全部像軟弱个細妹仔。你無法度在敵人面前保衛城門；你个門閂會被火燒掉。
14你愛囤水，防備敵人包圍！你愛加強防備！你愛踏泥做磚，預備磚模！
15你無論樣般做，還係愛被人燒死，抑係被人㓾死。你會像農作物被草蜢食到光光。
頭擺你𫱔子像草蜢恁遽恁多；
16你做生理个人比天頂个星仔較多！總係這下全部像草蜢退殼飛走了 。
17你个領袖像一群草蜢，寒天囥在牆縫肚，日頭一出來就全部飛走；無人知牠兜到㖠位去。
18 亞述皇帝啊，你該兜大臣全部橫掉；你个官員全部睡死了。你个人民分散在山肚，無人帶佢等轉來。
19你个損傷無法度補救；你个傷口無法度醫好。所有聽到你壞消息个人全部歡喜拍手。你長久个暴行，有麼人無受過你个屙糟災呢？
Who We AreWhat We EelieveWhat We Do
2025 by iamachristian.org,Inc All rights reserved.
