歷代志下 28 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

猶大王亞哈斯(列王紀下 16:1-4)

1 亞哈斯二十歲个時做王；佢在耶路撒冷統治十六年。佢無學厥祖先大衛王行上主看做著个事；

2佢反轉學以色列列王个壞模樣，鑄造巴力个像，

3在欣嫩子山壢燒香，甚至將自家个孻仔用火燒來獻給偶像，學原來外族人个邪惡行為；該兜人民就係以色列人入去這地个時上主逐出去个人。

4亞哈斯在神廟內、山岡頂、㧯逐頭大樹下獻祭燒香。

㧯敘利亞並以色列戰爭(列王紀下 16:5)

5-6因為亞哈斯王犯罪，上主 — 佢个上帝俾敘利亞王打贏佢，捉當多猶大人到大馬士革去。上主也俾利瑪利个孻仔以色列王比加大贏亞哈斯，在一日內㓾掉十二萬猶大个精兵。上主 — 佢等祖先个上帝准這事發生係因為猶大人民離開佢。

7一個以色列士兵細基利㓾掉亞哈斯王个孻仔瑪西雅，也㓾掉王宮總管押斯利甘㧯宰相以利加拿。

8以色列軍隊將佢等个同胞猶大人，連𡜵娘人㧯細人仔總共二十萬人捉到撒馬利亞去，也搶走盡多財物。

先知俄德

9有上主个一個先知安到俄德，住在撒馬利亞城。以色列軍隊帶等對猶大捉來个人轉到撒馬利亞、愛入城个時，俄德去見佢等，講：「上主 — 你等祖先个上帝因為惱猶大正俾你等打贏佢等，你等卻大發譴，亂㓾佢等。

10這下，你等又想愛使耶路撒冷㧯猶大个男女做你等个奴才。敢講你等毋識得罪上主 — 你等个上帝係麼？

11聽𠊎講！這兜捉來个人係你等个兄弟姊妹。放佢等轉去，因為上主向你等大發譴了。」

12北國个以法蓮有幾個領袖 — 約哈難个孻仔亞撒利雅、米實利末个孻仔比利家、沙龍个孻仔耶希西家、哈得萊个孻仔亞瑪撒共下阻擋戰爭轉來个軍隊。

13佢等講：「毋好將該兜捉來个人帶到這位來！𠊎等早就得罪上主；應該被佢責罰。你等這下還愛作惡加重𠊎等个罪係麼？𠊎等个過犯已經罅重了；上主个發譴已經臨到以色列了。」

14所以這兜軍隊將捉到个人㧯戰利品交給人民㧯佢等个領袖。

15佢等推選這四個領袖出來照顧捉來个人；對搶來个戰利品中拿衫褲㧯鞋給捉來个人著，給佢等罅額个食物，又用橄欖油膏佢等个傷口，將毋會行个放在驢仔背頂，送所有捉來个人轉猶大地區，到棕樹城耶利哥去。然後，以色列人倒轉撒馬利亞。

亞哈斯求亞述(列王紀下 16:7-9)

16-17 以東人又來侵犯猶大，捉去盡多人。所以，亞哈斯王求亞述皇帝提革拉‧比列色幫助。

18就在這時，非利士人侵犯猶大南片㧯西片山腳下个城市。佢等佔領伯‧示麥、亞雅崙、基低羅、梭哥、亭拿、瑾鎖，㧯附近个村莊，又住在該位。

19猶大王 亞哈斯害人民大大得罪上主，所以上主使災難臨到猶大。

20亞述皇帝毋單淨毋幫助亞哈斯，反轉來欺負佢。

21所以亞哈斯就將上主聖殿㧯王宮个金仔，並民間領袖屋下个金仔全部送給亞述皇帝；總係恁樣還係無麼介用。

亞哈斯犯罪

22在這當艱難个時節，亞哈斯王反轉比以前更加得罪上主。

23佢獻牲儀給大馬士革个神明，因為敘利亞人打贏佢。佢講：「這係因為佢等个神明幫助佢等；若係𠊎向佢等个神明獻祭，佢等也可能會幫助𠊎。」總係該兜神明使亞哈斯㧯佢个國滅亡。

24亞哈斯又將上帝聖殿肚所有个東西敲碎，將上主个聖殿關起來，在耶路撒冷逐轉角个所在設立祭壇。

25佢又在猶大逐個城市个山岡頂起神廟，向外族神明燒香。恁樣，亞哈斯惹上主 — 厥祖先个上帝發譴。

26 亞哈斯其他个事㧯佢个行為，從頭到尾全部記在《猶大㧯以色列列王史》底背。

27亞哈斯死後葬在耶路撒冷，總係無放在王室个墳墓肚。佢个孻仔希西家承接佢做王。