以賽亞書 15 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上帝愛毀滅摩押

1下背係有關摩押个信息。

亞珥城㧯基珥城一暗晡就滅掉了。摩押地做一暗晡廢掉了。

2底本人 爬上山，在佢等个神廟肚哀傷大噭；摩押人為到尼波㧯米底巴城傷心盡噭；佢等悲哀到剃掉頭那毛，刮掉鬍鬚。

3在街路行个人民全部著麻衫；廣場㧯屋頂个人全部目汁濫泔大聲噭。

4希實本㧯以利亞利人全部大噭；佢等个噭聲連雅雜个人民也聽到了。所以摩押个士兵也全部著驚、失掉勇氣。

5𠊎个心為摩押悲傷！該地方个難民已經走到瑣珥㧯伊基拉‧施利施亞去了。有兜人爬上魯希坡，緊走緊噭；有兜人逃走到何羅念，開聲大噭。

6寧林个河壩無水，河壩滣个草燥掉，植物死掉，無半些青青个東西。

7所以，佢等帶等積存个財物，過柳樹坑壢逃難去了。

8在摩押邊界，逐所在聽得到大噭个聲，連住在以基蓮㧯比珥‧以琳个人也全部聽到了。

9底們城个河壩水全部係血；上帝還愛向底們个人民降下更大个災難。對摩押逃出來个難民全部會被獅仔食掉，該地所賸到个人也會共樣。