列王紀下 12 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

猶大王約阿施(歷代志下 24:1-16)

1 以色列王耶戶在位个第七年，約阿施做猶大王。佢在耶路撒冷統治四十年。厥姆西比亞係別是巴城个人。

2約阿施一生行上主看做著个事，因為有祭司耶何耶大教佢。

3總係，佢無除掉山岡頂个神廟，人民還係在該位獻祭燒香。

4 約阿施喊該兜祭司來，吩咐佢等好好保管該兜為到獻祭付給聖殿个錢，無論係個人應當獻个錢抑係自願奉獻个錢，

5逐個祭司愛負責保管佢所服務个人所獻个錢，這兜錢愛做整聖殿个用途。

6總係，到約阿施王在位第二十三年，該兜祭司還吂整聖殿。

7所以約阿施王召見祭司耶何耶大㧯其他个祭司，問佢等：「你等做麼介還吂整聖殿呢？對這下開始，你等毋使再負責保管收到个錢，愛將錢交出來，好開始整聖殿个工作。」

8該兜祭司同意毋使再負責收錢，也毋使負責整聖殿。

9所以，祭司耶何耶大拿來一隻箱仔，箱蓋頂高鑽一隻孔仔，放在祭壇附近，在聖殿入門口个右片。在入門口當班个祭司將該兜來敬拜个人所獻个錢全部放入箱肚。

10箱肚个錢滿了，王室書記㧯大祭司就來，將錢算好，包起來。

11佢等登記確實个數量以後，就將錢交給監督整聖殿个人。這兜人就付工錢給木匠、建築工人、

12泥水師傅、㧯打石師傅，又買木材㧯石材來整聖殿，還有支出所有其他整聖殿个費用。

13總係這兜錢無拿來製造銀杯、碗、喇叭、燈心剪，抑係其他金銀用品个用途，

14全部交給該兜監督个人拿去整聖殿。

15佢等將錢交給做工个人。監督个人做人誠實，毋使人㧯佢等算數。

16該兜贖過失祭㧯贖罪祭个錢就毋使放入去做聖殿个用途；這兜錢係歸給祭司个。

17該時，敘利亞王哈薛上去攻打迦特城，佔領後，就決定進攻耶路撒冷。

18猶大王約阿施將厥祖先約沙法、約何蘭、㧯亞哈謝這兜猶大王獻給上主个禮物，加上自家獻个禮物，並聖殿㧯王宮寶庫肚所有个金仔，全部拿來做禮物送給敘利亞王哈薛，所以哈薛就帶佢个軍隊離開耶路撒冷。

19 約阿施其他个事全部記在《猶大列王史》底背。

20-21 約阿施个官員陰謀造反；其中兩儕，一個係示米押个孻仔約撒甲，另外一個係朔默个孻仔約薩拔。佢等在愛下去悉拉路項个米羅宮 將約阿施㓾掉。約阿施葬在大衛城个王室墳墓肚；佢个孻仔亞瑪謝承接佢做王。