1上主㧯𠊎講話；
2佢講：「人子啊，你愛講預言責備亞捫人。
3愛喊佢等聽𠊎 — 至高个上主所講个話。𠊎恁樣講：你等歡喜看到𠊎个聖殿被人侮辱，歡喜看到以色列个土地荒廢，猶大人被人捉走。
4因為你等歡喜看人堵到災難，𠊎愛俾東方曠野來个民族佔領你等。佢等定著會在你等个土地安營，住在該位，食你等出產个水果，啉你等出產个乳。
5𠊎愛使拉巴城變做畜駱駝个所在，使亞捫全國成做羊群睡个牧場。恁樣，你等就會知𠊎係上主。
6「至高个上主恁樣講：因為你等歡喜到跳舞拍手，看人堵到災難就快樂，藐視以色列个土地，
7𠊎愛伸手攻擊你等，將你等交給外國人；佢等會來將你等个東西搶淨淨。𠊎愛消滅你等，使你等分散到毋成一個國家，毋會再有自家个土地。恁樣，你等就會知𠊎係上主。」
責備摩押8至高个上主恁樣講：「因為摩押
講猶大國㧯別个國家全無差別，9𠊎愛使摩押邊界个城市被人攻擊，連佢等最誇口个城堡 — 伯‧耶西末、巴力‧免、基列亭全部會被人攻擊。
10𠊎愛俾東片曠野來个民族佔領摩押，連亞捫人共下佔領，使摩押
被列國毋記得。11𠊎一定愛責罰摩押。恁樣，佢等就會知𠊎係上主。」
責備以東12至高个上主恁樣講：「以東人惡擎擎來向猶大人報復，佢等个罪惡極大。
13所以𠊎 — 至高个上主恁樣宣佈：𠊎愛伸手攻擊以東，將人㧯頭牲全部消滅。對提幔到底但个土地全部愛荒廢；所有个人全部會被人㓾掉。
14𠊎个子民以色列愛代𠊎向以東報仇。佢等愛照𠊎个大發譴來對付以東。恁樣，以東就會知𠊎在向佢報仇。」至高个上主恁樣宣佈了。
責備非利士15至高个上主恁樣講：「非利士人惡擎擎向佢等古早以來个仇敵 來報仇，存怨恨个心愛毀滅敵人。
16所以𠊎 — 至高个上主恁樣宣佈：𠊎愛伸手攻擊非利士人，消滅佢等，連在非利士平原賸到个人全部也愛消滅。
17𠊎愛大大責罰佢等，將大發譴拚給佢等，來報冤仇。恁樣，佢等就會知𠊎係上主。」
Who We AreWhat We EelieveWhat We Do
2025 by iamachristian.org,Inc All rights reserved.
