1𠊎个上帝！𠊎个上帝！
你做麼介放掉𠊎？
做麼介離開恁遠，
無救𠊎，無聽𠊎个噌聲？
2𠊎个上帝啊，𠊎日時頭求喊，你毋應；
𠊎暗晡時緊求，也得毋到安息。
3總係，你係至聖个，係坐寶座个；
以色列人頌讚个就係你 。
4你就係𠊎等祖先所信靠个；
佢等信靠你，你就拯救佢等。
5佢等求喊你，就得到拯救；
佢等信靠你，從來無失望。
6總係，𠊎像蟲，無像人，
被人侮辱藐視。
7看到𠊎个人全部嘲謔𠊎；
佢等笑到嘴弛弛，搖頭講：
8「佢倚靠上主，看上主樣般拯救佢！
上主既然合意佢，看佢樣般救佢！」
9上主啊，係你使𠊎平安出母胎个啊；
還在阿姆个懷中，你就做𠊎个倚靠。
10𠊎一出世，就交在你个手中；
離開母胎，你就係𠊎个上帝。
11求你毋好離開𠊎恁遠！
災難來到，無人幫助𠊎。
12盡多敵人像牛包圍𠊎，
像巴珊大力个牛牯圍困𠊎。
13佢等像吼吼滾个獅仔，
嘴擘到大大想愛吞滅。
14𠊎像水潑在泥下，軟濟濟；
𠊎个骨頭像係𢫫腕一樣；
心肝像蠟，在肚笥內溶掉。
15𠊎个精力像泥罐燥掉；
舌乸黏在上齶。
你由在𠊎橫在泥下等死。
16壞人湊等來圍困𠊎，
像癲狗歸群圍等𠊎；
佢等將𠊎个手腳扯裂 ；
17𠊎算得到自家个骨頭。
仇敵目瞋瞋看𠊎；
18佢等分𠊎个外衫，
為𠊎个內衫抽籤。
19上主啊，求你毋好離開𠊎恁遠！
𠊎个救主啊，求你遽遽來幫助𠊎！
20求你救𠊎个命脫離刀劍；
俾𠊎脫離該群癲狗个轄制。
21求你救𠊎脫離這兜獅仔个嘴；
你已經救𠊎 脫離野牛个角！
22𠊎愛對𠊎个同胞傳揚你个名；
𠊎愛在佢等个聚會中讚美你：
23敬畏上主个啊，你等愛讚美佢！
雅各个後代啊，你等愛榮光佢！
以色列人民啊，你等愛敬畏佢！
24因為佢無藐視窮苦人，
無毋記得佢个困苦；
佢無揞等面毋搭佢，
反轉應答佢个求喊。
25𠊎愛在全會眾面前頌讚你个作為，
在敬畏你个人面前還𠊎所許个願。
26願窮苦个人有好食飽，
尋求上主个人讚美佢。
願你等永遠心存希望！
27願地上个萬民攏總紀念上主，歸順佢；
願萬邦萬國所有个宗族全部跪拜佢。
28因為王權屬於上主；
佢係萬國个統治者。
29地上所有富足个人愛食飽又跪拜佢；
所有愛歸土个，就係性命難保个人也愛伏拜佢。
30世世代代个人愛事奉佢，
也愛將主个事傳給佢等个後代。
31佢等愛繼續傳揚佢个拯救，
使子子孫孫全部聽到佢所行个。
Who We AreWhat We EelieveWhat We Do
2025 by iamachristian.org,Inc All rights reserved.
