以賽亞書 38 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

希西家王發病㧯康復(列王紀下 20:1-11；歷代志下 32:24-26)

1該時，希西家王病到會死。亞摩斯个孻仔先知以賽亞去見王，對佢講：「上主恁樣講：『你愛留遺言、交帶後事，因為你个病毋會好，一定會死。』」

2 希西家翻身面向壁，祈禱講：

3「上主啊，求你紀念𠊎識誠心誠意事奉你，做你看做著个事。」希西家忍毋住就開聲大噭。

4所以，上主吩咐以賽亞講：

5「你去希西家該位，對佢講：『上主 — 若祖先大衛个上帝恁樣講：𠊎已經聽到你个祈禱，也看到你个目汁；𠊎愛俾你食加十五年。

6𠊎也愛拯救你㧯耶路撒冷脫離亞述皇帝个手；𠊎愛繼續保護這城。』」

7 以賽亞講：「這係上主給你个兆頭，來證明佢一定會成就佢所講个：

8在亞哈斯王所造个日晷 ，上主愛使日頭影倒退十步。」果然，日晷个日頭影倒退十步。

9 猶大王希西家病好以後，寫一首讚美詩，講：

10雖然𠊎个年日還像當晝个日頭，

𠊎恅到當遽就會入去陰間，

無法度享受天年了。

11𠊎恅到在這世間

毋會再見到上主，

也毋會再看到所有還在世間个人。

12𠊎个生命會離開肉身了，

像掌羊个人帳篷被人拆掉，

像布仔被人對織布機割下。

𠊎想上主愛結束𠊎个生命，

𠊎毋會有天光日、天光暗晡了 。

13𠊎歸暗晡痛苦到緊噌，

𠊎所有个骨頭像被獅仔咬碎；

𠊎想上主愛結束𠊎个生命，

𠊎毋會有天光日、天光暗晡了。

14𠊎求幫助个聲

像燕仔啾啾袞，

像白鶴仔緊噭，

像月鴿仔齁齁袞。

𠊎个目珠因為望天看到當𤸁。

主啊，𠊎在困苦中，求你來救𠊎。

15上主照佢所講个做；

𠊎有麼介好講呢？

𠊎个心艱苦到睡毋落覺 。

16主啊，人會生係因為你，

𠊎个靈㧯生命也係因為你；

求你醫治𠊎，俾𠊎繼續生下去！

17看啊，𠊎受个苦會使𠊎得到平安；

你惜𠊎，就救𠊎脫離滅亡个陷阱，

因為你赦免𠊎所有个罪過。

18因為陰間無人會感謝你；

死掉个人毋會讚美你；

落陰間个人毋會仰望你个信實。

19只有還生个人 —

還生个人正會讚美你，

就像𠊎這下讚美你。

做阿爸个愛㧯子女講，

你係樣般信實！

20上主愛救𠊎！

𠊎等愛彈琴、唱歌讚美佢；

還有生命个日，

𠊎等愛在上主个聖殿中讚美佢。

21 以賽亞已經吩咐王个僕人，愛拿一垤無花果膏藥來，貼在粒仔頂，王就會好。

22希西家已經問過：「有麼介兆頭好證明𠊎還能到上主个聖殿去敬拜呢？」