1上主對佢个子民恁樣講：「你等愛守公平行公義，因為𠊎个救恩近了，𠊎个公義會顯明。
2𠊎愛賜福給該兜確實遵守安息日毋肯違犯个人；𠊎愛賜福給一切遠離邪惡个人。」
3改信上主个外族人毋好講：「上主絕對毋會俾𠊎㧯佢个子民共下做禮拜。」
太監也毋好講：「看啊，𠊎係一頭燥樹仔。」
4因為上主恁樣講：「若係你等太監謹守𠊎个安息日，做𠊎所歡喜个事，又堅定遵守𠊎个約，
5𠊎就俾你等个名在𠊎个聖殿㧯𠊎个子民中間受人紀念，贏過有盡多个子女个。你等永遠毋會被人除名。」
6有兜外族人已經改信上主，愛服事佢，愛稱頌上主个名，愛做佢个僕人，又確實遵守安息日毋肯違犯，堅定遵守上主个約个，
7上主講：「𠊎愛帶佢等到𠊎个聖山錫安，使佢等在𠊎祈禱个殿中有喜樂。𠊎愛接受佢等在祭壇頂所獻个燒化祭㧯牲儀；因為𠊎个聖殿愛稱做萬民祈禱个殿。」
8至高个上主 — 就係將被人逐散个以色列人帶轉家鄉个，恁樣講：「𠊎還愛聚集其他个人民也來加入佢等个行列。」
以色列个領袖受責備9上主識喊外國人像山野㧯樹林中个野獸恁樣相爭來吞食佢个子民！
10佢講：「所有个守望者全部係青盲；佢等完全看毋出危險，毋知愛警告𠊎个子民。佢等係一群毋會吠个狗，歸日睡等發夢！
11佢等像貪食个狗，食毋知飽；佢等原來係牧人，總係麼介都毋知，逐儕偏行自家个路，追求自家个利益。
12佢等講：『來！𠊎來去拿酒！𠊎等來放勢啉釅酒；天光日毋會無掉去，無一定會比今晡日還較好！』」
Who We AreWhat We EelieveWhat We Do
2025 by iamachristian.org,Inc All rights reserved.
