以西結書 48 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

七支族分配土地

1-7土地北片个地界係對地中海向東經過希特倫、哈馬隘口、哈薩‧以難，直到大馬士革王國㧯哈馬王國个交界。逐支族愛在這垤土地 — 對東片个邊界到西片个地中海，照但、亞設、拿弗他利、瑪拿西、以法蓮、呂便、猶大个順序，對北到南各分到一份土地。

中部个特區

8愛在猶大南片畫出一垤土地做特別用途。這垤土地對北到南闊十二公里半，對東到西㧯逐支族分到个土地平闊。聖殿愛起在這地當中。

9在這垤土地个中心愛留一片長十二公里半、闊十公里 个地獻給上主。

10祭司愛得這垤聖區个一部份土地。佢等所分到个，對東到西十二公里半，對北到南五公里。上主个聖殿在這區个中央。

11這聖區係給撒督後代做祭司个。佢等忠心事奉𠊎，無像利未支族个人去跈以色列人悖逆𠊎。

12所以，佢等愛在利未支族个堘頭分一份土地；這特區个土地係至聖个。

13利未支族愛在祭司个土地堘頭分到一特區，對東到西十二公里半，對北到南五公里。

14獻給上主个這區係全國最好个土地，做毋得買賣、交換，抑係送人。這垤土地係聖个，係屬上主个。

15特區還賸一垤長十二公里半、闊兩公里半个土地；這垤地毋係聖地，一般人做得住，做得使用。城愛起在這區个中央。

16城係四方形个，逐片長兩千兩百五十公尺。

17城个四周圍愛留空地，逐片闊一百二十五公尺。

18城起好所賸个聖區南片一垤土地，東片長五公里、闊兩公里半，西片長五公里、闊兩公里半；這垤地係給城肚个人民耕種用个。

19所有在城肚工作个人，無論佢屬以色列㖠支族，全部做得耕種這地。

20恁樣，所畫出个地个中心係特別地區，係四方形个，逐片係十二公里半，底背有聖區㧯城市用地。

21-22這特別地區包含聖殿、祭司个土地、利未支族个土地、城市、㧯城市用地。這地區个東片㧯西片所賸到个地全部歸屬王，向東到東片个地界，向西到地中海，北片㧯猶大个地界連接，南片㧯便雅憫个地界連接。

其他支族个土地

23-27愛將特區南片个土地分給其他各支族；對東片个地界到西片个地中海，照便雅憫、西緬、以薩迦、西布倫、迦得个順序，對北到南各得一份。

28 迦得支族南片个地界係對他瑪向西南經過米利巴‧加低斯个河壩，再向西北跈等埃及邊界个細河壩，直到地中海。

29至高个上主恁樣講：「愛用抽籤个方法將這垤土地分給以色列各支族，做佢等个產業。」

耶路撒冷个城門

30-34該城市總共有十二個城門。四面个城牆各長兩千兩百五十公尺，各有三個城門。逐個門照以色列支族安名。北牆个三隻門係呂便、猶大、利未；東牆个三隻門係約瑟、便雅憫、但；南牆个三隻門係西緬、以薩迦、西布倫；西牆个三隻門係迦得、亞設、拿弗他利。

35城牆四周圍一共長九千公尺。從今以後，這城愛喊做『上主在該位。』