啟示錄 5 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

書卷㧯羔羊

1𠊎看到該坐在寶座上个，右手拿等一卷書；這卷書兩面寫到滿滿个字，係用七隻印仔封等。

2𠊎又看到一個盡勇壯个天使，大聲宣佈講：「麼人有資格掀開這兜印仔，打開這卷書呢？」

3總係，無論在天頂、地上、抑係地底下，攏總無人能打開抑係看該卷書。

4𠊎就大聲噭，因為無人有資格打開抑係看該卷書。

5長老中有一個對𠊎講：「毋使噭！你看，該對猶大支族出來个獅仔 — 大衛个後代已經得勝了；佢能掀開該七隻印仔，打開該卷書。」

6接等，𠊎看到在寶座㧯四個生物个中央，就係眾長老圍等个中央，有羔羊企等。該羔羊像係被人㓾過个，有七支角，七隻目珠，就係上帝个七個靈，係奉差派到世間逐所在去个。

7該羔羊進前來，對坐在寶座上个右手將該卷書接過來。

8佢接過該卷書个時，四個生物㧯二十四個長老就跪在羔羊个面前。逐個長老拿等弦琴㧯裝滿香个金爐；這香係眾聖徒个祈禱。

9佢等唱一首新个詩歌，講：

唯有你有資格接受該卷書，

掀開該兜頂高个印仔；

因為你識被人㓾死！

你通過流血到死，

對各種族、各語言、

各民族、㧯逐個國家，

將人贖轉來，歸給上帝。

10你使佢等成做一個國，

做祭司來服事𠊎等个上帝；

佢等會統治世界。

11繼續看下去，𠊎聽到有千千萬萬天使个聲音。佢等圍等企在寶座、㧯四個生物、並眾長老个周圍，

12大聲唱詩講：

被人㓾死个羔羊，

有資格接受權能、

豐盛、智慧、力量、

尊貴、榮光、㧯頌讚！

13𠊎又聽到天頂、地上、地底下、㧯海肚一切受造个，就係宇宙間个萬物，攏總唱詩，講：

願頌讚、尊貴、榮光、㧯權柄，

全部歸給該坐寶座个㧯羔羊，

直到永永遠遠！

14四個生物應講：「阿愐！」眾長老就伏落去拜佢。