民數記 4 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

哥轄宗族个任務

1上主吩咐摩西㧯亞倫

2照宗族、家族調查利未人哥轄宗族个人口，

3將所有三十歲到五十歲中間、會在聖帳篷底背工作个男人全部登記下來。

4上主指示摩西，哥轄宗族在聖帳篷底背愛專門做㧯至聖物有關个工作。

5在徙營个時，亞倫㧯佢該兜孻仔愛進入聖帳篷，將隔等約櫃个帳幔拿下來，揜在約櫃頂高。

6佢等還愛用盡靚个皮料揜在頂高，再揜一垤純藍色个布仔，然後將槓仔穿過去。

7佢等愛鋪一垤藍色个布仔在供餅个桌頂，再將盤仔、碗、敬神用个酒壺㧯酒杯全部放在頂高。桌頂愛時常排列供餅。

8佢等還愛用一垤深紅色个布仔揜在這兜東西頂高，再揜一層盡靚个皮料，然後將槓仔穿過去。

9佢等愛用藍色个布仔揜燈臺、燈、燈花剪刀、燈盤、㧯所有裝橄欖油个用品；

10又愛用盡靚个皮料將這兜東西包起來，放在扛架頂高。

11再來，佢等愛鋪一垤藍色个布仔在金香壇頂，並用盡靚个皮料揜等，然後將槓仔穿過去。

12愛用藍布將所有聖所底背个用品包起來，並用盡靚个皮料揜等，放在扛架頂高。

13愛將祭壇頂个灰收起來，用紫色个布仔揜在祭壇頂，

14將所有祭壇个附件，就係火灰盤、肉叉、鏟仔㧯火鼎全部放在頂高，然後愛用盡靚个皮料揜在頂高，將槓仔穿過去。

15徙營个時，哥轄宗族愛等亞倫㧯佢該兜孻仔將這兜聖物㧯所有个零件揜好以後，正來扛。哥轄宗族个人絕對做毋得摸到這兜聖物，若係摸到就會死。

徙聖帳篷个時，哥轄宗族愛負責扛這兜東西。

16祭司亞倫个孻仔以利亞撒愛負責掌管歸隻聖帳篷，並燈油、香、素祭、聖油，㧯聖帳篷底背所有分別為聖歸給上主个東西。

17上主對摩西㧯亞倫講：

18「毋好俾哥轄宗族个人行近這兜至聖物，免得佢等死掉。

19為到避免發生這種事，亞倫㧯佢該兜孻仔愛進入聖帳篷，分派佢等逐儕个工作，㧯佢等說明所愛扛个係麼介。

20總係，哥轄人入聖帳篷，毋好去看到聖物，免得佢等會死。」

革順宗族个任務

21上主命令摩西，

22愛照宗族、家族調查利未人 革順宗族个人口，

23將所有三十歲到五十歲中間、會在聖帳篷底背工作个男人全部登記下來。

24革順宗族愛負責扛以下个東西：

25聖帳篷內个篷頂㧯外層个頂蓋、揜在頂高盡靚个皮料、門簾、

26聖帳篷㧯祭壇周圍庭院个帳幔㧯索仔、庭院大門个門簾，㧯這兜東西个附件全部放好勢。佢等愛管理所有㧯這兜東西有關个事務。

27摩西㧯亞倫愛監督革順宗族个人負責扛這兜東西，掌等佢等搬運亞倫㧯佢該兜孻仔派佢等搬運个物件。

28這兜工作係革順宗族在聖帳篷底背應該做个事。佢等愛在祭司亞倫个孻仔以他瑪个指揮下背執行任務。

米拉利宗族个任務

29上主愛摩西照宗族、家族調查利未人 米拉利宗族个人口，

30將所有三十歲到五十歲中間、會在聖帳篷底背工作个男人全部登記下來。

31佢等愛負責扛聖帳篷个骨架、橫杠、柱仔、基座，

32㧯聖帳篷周圍庭院个柱仔、基座、釘仔、索仔，並這兜東西个零件。逐儕愛負責扛指定个東西。

33這兜係米拉利宗族在聖帳篷底背應該做个事。佢等愛在祭司亞倫个孻仔以他瑪个指揮下背執行任務。

利未人个人口調查

34-48 摩西、亞倫㧯會眾个領袖遵照上主个命令調查利未三隻宗族哥轄、革順、米拉利个人口。佢等照宗族、家族，將所有三十歲到五十歲中間、會在聖帳篷底背工作个男人全部登記下來：

哥轄宗族，兩千七百五十人；

革順宗族，兩千六百三十人；

米拉利宗族，三千兩百人；

總人數，八千五百八十人。

49照上主給摩西个命令，逐儕全部登記了；遵照上主通過摩西所命令个，逐儕全部有指定个任務，有兜負責事奉，有兜負責扛。