1 以色列還吂有君王該段期間，有一個利未人住在以法蓮偏僻个山區。佢討猶大个伯利恆一個細妹仔做細姐。
2這細姐對老公發譴 ，轉到伯利恆外家，在該位住四個月。
3後來這利未人決定去尋姖，想愛勸姖轉到自家身邊。佢帶一個僕人、兩隻驢仔去。這細妹仔請佢入去屋肚；佢个丈人老看到就熱誠歡迎佢，
4堅持愛佢留下來，所以佢就住三日。公婆兩儕停留在該位食啉，睡目。
5到第四日朝晨，佢等打早䟘起來，準備離開；總係佢个丈人老對佢講：「先食兜東西！你會感覺較有元氣，然後正走。」
6所以，兩儕坐下來，共下食啉。佢个丈人老對佢講：「歇加一暗晡，放較輕鬆兜仔。」
7 利未人企起來愛走，佢个丈人老強留佢，所以佢又歇一暗晡。
8第五日打早，利未人準備離開；佢个丈人老又講：「先食兜東西，過晝以後正走！」所以兩儕又共下食啉。
9這儕㧯佢个細姐、僕人又預備愛走，佢个丈人老又講：「你看，天會暗囉，歇加一暗晡哪！無幾久就會斷烏囉，歇在這位好好享受享受。天光日打早你就做得起身轉屋下去。」
10總係，這個人無愛再留下來，就㧯佢个細姐起身。佢等帶等兩隻載滿東西个驢仔出發。
11當佢等來到耶布斯 (就係耶路撒冷) 附近，天已經暗了，僕人對主人講：「𠊎等來去這耶布斯城歇一暗晡！」
12-13總係主人講：「𠊎等毋好進入毋係以色列人住个外邦人个城肚；𠊎等愛向前行，在基比亞抑係拉瑪過夜。」
14所以佢等經過耶布斯，繼續向前行。佢等到便雅憫支族境內个基比亞，日頭已經落山了；
15佢等入城，愛在該位過夜。佢等到城肚，在廣場坐下來，總係無人接待佢等到屋下過夜。
16該暗晡，有一個老人家對田肚工作轉來，經過該位。以前佢住以法蓮山區，這下住在基比亞。 (基比亞个人民本來係便雅憫支族人。)
17這老人家看到有過路人在廣場，就問佢：「你對㖠位來？愛到㖠位去？」
18 利未人應講：「𠊎等對猶大个伯利恆來，愛轉以法蓮偏僻个山區去。𠊎就住在該位。𠊎正對猶大个伯利恆來，這下愛到上主个聖殿去，總係無人招待𠊎過夜。
19𠊎等有飼料、草料好餵驢仔；𠊎㧯𠊎个細姐並𠊎个僕人也有自家食个餅㧯酒，𠊎等需要用个逐項全部有。」
20老人家講：「歡迎你等到𠊎屋下來！你等需要麼介，𠊎全部會給你等；毋好在廣場過夜。」
21恁樣佢就帶佢等轉屋下，又餵飽驢仔；佢等就洗腳、食飯。
22佢等當輕鬆歡喜个時，忽然城肚个鱸鰻仔來包圍這間屋，連連掽門，對老人家講：「將該㧯你共下轉屋下个人帶出來，𠊎等愛㧯佢發生性關係！」
23老人家到門外對佢等講：「朋友，千萬做毋得做這恁積惡个事！這個人係𠊎个人客，你等絕對毋好做這恁淫亂个事！
24看啊，佢个細姐在這位，還有𠊎自家个妹仔，姖還係童貞女，這下𠊎將姖等交給你等，你等做得照自家个心意對待姖等；絕對毋好對這個人做該種恁積惡个事！」
25總係佢等毋聽。利未人就將佢个細姐強強㩳出門外給佢等。佢等強姦姖，歸夜侮辱姖，一直到天曚光正放姖走。
26天光个時，這婦人家倒轉來，橫在厥老公歇个老人家屋下个門口。天大光个時，姖還橫在該位。
27厥老公朝晨䟘起來，開門愛走，發現佢个細姐橫在門口，雙手放在門檻頂。
28佢對婦人家講：「䟘起來，𠊎等愛走了！」總係姖無應。所以佢將姖个身屍放在驢仔个背頂，向轉屋下个路去。
29到屋下个時，佢入去拿一支刀仔，將厥細姐个身屍剁做十二垤，送到以色列十二支族該位。
30看到个人全部講：「𠊎等從來毋識看過這種事！對以色列人離開埃及以來，無發生過這種事！𠊎等一定愛來參詳，應該樣般做！」
Who We AreWhat We EelieveWhat We Do
2025 by iamachristian.org,Inc All rights reserved.
