1你等愛感謝上主，求喊佢个名；
愛向萬國傳揚佢个作為！
2你等愛唱歌來頌讚佢！
愛講說佢奇妙个作為！
3你等愛因為佢个聖名快樂！
願一切尋求上主个人歡喜！
4愛求上主幫助；
愛時常敬拜佢。
5-6上帝个僕人亞伯拉罕个後代啊，
雅各个子孫，佢所揀選个子民啊，
你等愛記得佢所做奇妙个作為，
佢所行个神蹟㧯所講起个審判。
7佢係上主 — 𠊎等个上帝；
佢个審判傳遍全世界。
8佢會永遠守佢个約；
佢所講个應許直到千代。
9佢記得同亞伯拉罕所立个約，
還有佢發誓賜給以撒个應許。
10上主同雅各堅定這約做條例，
就係佢給以色列永久个契約。
11佢講：「𠊎愛將迦南地賜給你，
全部愛做你等个產業。」
12該時，上帝子民个人丁有限，數目盡少，
在迦南地暫時住。
13佢等對這族漂流到該族，
對這國流浪到該國。
14總係上帝不准外人欺負佢等；
為到佢等，佢警告外族該兜王。
15佢講：「做毋得為難𠊎所揀選个；
你等做毋得傷害𠊎个先知！」
16上主使該地方堵到飢荒；
佢切斷佢等糧食个來源。
17總係佢差約瑟為佢等先行；
約瑟被人賣做奴才。
18佢个雙腳被腳鐐鎖等，
佢个頸筋帶等鐵枷鎖。
19上主个話緊試煉佢，
直到佢所預言个事實現。
20 埃及个王就派人去將佢釋放；
統治人民个就恢復佢个自由，
21派佢做王宮个掌管，
喊佢治理佢所有个一切，
22給佢自由管理文武百官，
有權將智慧教該兜元老。
23後來以色列去到埃及，
雅各暫住在含个地方。
24上主使佢个子民增加，
使佢等比敵人較強盛。
25佢使埃及人怨恨佢个子民；
佢等用詭計對付佢个僕人。
26佢就差佢个僕人摩西，
又派佢所揀選个亞倫。
27佢等顯出上帝个神蹟，
在含个地方行大奇事。
28上帝使該位充滿烏暗，
總係埃及人毋聽佢个命令 。
29佢將佢等个河水變做血，
使佢等个魚全部死淨淨。
30佢等國內逐位係蝦蟆，
連王宮底背也係共樣。
31上帝下令，烏蠅歸群飛來，
蝨乸也係共樣，遍滿全地。
32佢降冰雹像落雨，
使𥍉爧到處緊𥍉。
33佢打壞葡萄樹㧯無花果樹，
打斷佢等國內所有个樹木。
34佢一出聲，草蜢就飛來，
千千萬萬，無辦法好算。
35牠兜將國內个青菜喫淨淨，
將田園所有个五榖食光光。
36佢㓾死國內所有个長子，
就係該兜人頭胎个孻仔。
37然後，佢就帶領以色列人出來；
佢等帶等金銀，各支族儕儕勇健。
38佢等離開个時，埃及人非常歡喜，
因為佢等驚以色列人驚到會死。
39上帝用雲遮等佢个子民，
暗晡時用火來照光佢等。
40佢等 要求，佢就使鵪鶉飛來；
又對天頂降糧食滿足佢等。
41佢打開磐石，使泉水湧出來，
水像河壩流在燥燥个曠野。
42因為佢記得佢神聖个應許，
就係對佢僕人亞伯拉罕所講个。
43佢帶佢个子民歡歡喜喜出來；
佢所揀選个子民歡呼又唱歌。
44佢將列國个土地賜給佢等，
使佢等承受外族人个田園，
45好俾佢个子民守佢个規則，
並遵行佢一切个教示。
愛讚美上主！
Who We AreWhat We EelieveWhat We Do
2025 by iamachristian.org,Inc All rights reserved.
