1耶穌又對佢等講：「𠊎實在㧯你等講，企在這位个人，有兜在死以前會看到上帝个主權大有能力來實現。」
改變形像(馬太 17:1-13；路加 9:28-36)2六日以後，耶穌帶等彼得、雅各㧯約翰，恬恬仔上一座高山。在佢等面前，耶穌个形像改變：
3佢个衫發光，非常个白，世間無人能將布仔漂到恁白。
4三個學生忽然看到以利亞㧯摩西在該位同耶穌講話。
5彼得對耶穌講：「先生，𠊎等在這位盡好！𠊎等來搭三間寮仔，一間給你，一間給摩西，一間給以利亞。」
6因為三個學生盡驚，彼得毋知愛講麼介正好。
7這時有雲出現，遮等佢等。忽然有聲對雲中傳出來講：「這係𠊎所惜个孻仔。你等愛聽從佢！」
8佢等趕緊四面緊尋，總係無看到別人，只有耶穌同佢等共下。
9佢等下山个時，耶穌吩咐佢等講：「人子吂對死復活以前，千萬毋好將所看到个事㧯別人講。」
10佢等遵守耶穌个話，總係彼此討論講：「對死復活到底係麼介意思？」
11佢等又問耶穌講：「經學教師樣會講，以利亞定著愛先來呢？」
12耶穌應講：「有影，以利亞愛先來使萬事復原；總係聖經樣般又講，人子必定會受盡多苦並被人棄絕呢？
13總係𠊎㧯你等講，以利亞已經來了；佢等也隨心所愛來對待佢，像聖經所講關係佢个話一樣。」
醫好被鬼附身个細人仔(馬太 17:14-21；路加 9:37-43)14佢等倒轉去其他學生該位个時，看到一大群人圍等佢等。有兜經學教師在該位同學生辯論。
15眾人一看到耶穌，全部非常奇怪，就走等去迎接佢。
16耶穌問學生講：「你等同佢等辯論麼介？」
17人群中有一個人應講：「先生，𠊎帶等𠊎个孻仔來尋你；因為佢被啞仔鬼附身，無法度講話。
18逐擺鬼攻擊佢个時，就將佢抨落地泥下，使佢嘴緊浡泡，咬𢫮牙鉸，歸身硬硬。𠊎要求若學生逐這個鬼走，總係佢等無辦法。」
19耶穌對佢等講：「你等這世代个人樣般恁無信心！𠊎還愛在你等這位幾久呢？還愛忍耐你等幾久呢？將細人仔帶來𠊎這位！」
20佢等就將細人仔帶過來。
該鬼一看到耶穌，就使細人仔大抽筋，橫在地上滾來滾去，嘴緊浡泡。
21耶穌問佢个阿爸講：「佢發這個病有幾久了？」
佢應講：「從細就有囉。
22鬼盡多擺想愛害死佢，將佢抨到火底背，㩳落水中。你若有辦法，求你憐憫𠊎等，幫助𠊎等！」
23耶穌講：「係噢，你若有辦法！有信心个人，麼介事情都有可能。」
24細人仔个阿爸黏時大聲講：「𠊎信，總係𠊎个信心毋罅，求你幫助𠊎！」
25耶穌看到眾人圍等來，就嚴嚴責備該邪靈講：「你這聾啞鬼，𠊎命令你對這細人仔身上出來，不准你再入去！」
26該鬼大喊一聲，使細人仔大抽筋一陣仔，就出來。細人仔卻像死掉一樣；大家講：「佢死掉囉！」
27總係耶穌牽等佢个手，扶佢䟘起來，佢就企起來。
28耶穌一入去屋肚，學生就暗中問佢講：「𠊎等樣般無法度將該鬼逐出去呢？」
29耶穌應講：「只有靠祈禱正逐得走這種个鬼，以外無別个辦法。」
耶穌再預言自家个死㧯復活(馬太 17:22-23；路加 9:43-45)30佢等離開該地方，經過加利利。耶穌無愛俾人知佢去㖠，
31因為佢在該位教學生。佢講：「人子會被人交在人个手中；佢等會殺害佢；死後第三日佢會復活。」
32總係佢等毋會了解這話个意思，又毋敢問佢。
麼人最偉大(馬太 18:1-5；路加 9:46-48)33佢等來到迦百農，入去屋肚後，耶穌問厥學生講：「你等在路上爭論麼介哪？」
34佢等毋敢出聲，因為佢等歸路爭無停：麼人最偉大。
35耶穌坐下來，喊十二個學生到佢面前來，對佢等講：「想愛做頭个，佢就愛做最細个，做眾人个僕人。」
36然後佢喊一個細人仔來到佢等當中，揇等佢，對佢等講：
37「為到𠊎个名接待一個像這細人仔个，就係接待𠊎。接待𠊎个，毋係單淨接待𠊎，也係接待該差𠊎來个。」
反對抑係贊成(路加 9:49-50)38 約翰對耶穌講：「先生，𠊎等看到有人奉你个名逐鬼，𠊎等就禁止佢，因為佢毋係跈𠊎等个。」
39耶穌講：「毋好禁止佢；因為無人會奉𠊎个名行神蹟，黏時又反過來講壞話攻擊𠊎。
40毋係反對𠊎等个，就係贊成𠊎等个。
41𠊎實在㧯你等講，無論麼人，因為你等屬基督，拿一杯水給你等啉，佢一定會得到獎賞。」
愛棄絕罪个誘惑(馬太 18:6-9；路加 17:1-2；14:34-35)42耶穌講：「無論麼人害信徒中任何一個微細个人離開𠊎，佢最好被人用大磨石紽等頸筋，㧒落海肚去。
43若係你个一支手害你犯罪，斬掉它！少一支手來得到永遠个生命，較贏雙手好好落地獄，落在永遠不滅个烈火中。
45若係你个一支腳害你犯罪，斬掉它！少一支腳來得到永遠个生命，較贏雙腳好好卻㧒落地獄。
47若係你个一隻目珠害你犯罪，將它挖出來！少一隻目珠入上帝个國，較贏雙目好好卻㧒落地獄。
48在該位，蟲仔毋會死，烈火永遠不滅。
49「每一個人會被火試煉，像被鹽鹵一樣。
50鹽係好个，總係鹽若失掉鹹味，愛樣般使它再鹹呢？你等愛有鹽个作用，又愛彼此和睦。」
Who We AreWhat We EelieveWhat We Do
2025 by iamachristian.org,Inc All rights reserved.
