詩篇 43 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

流亡者个祈禱 (下)

1上帝啊，求你宣判𠊎無罪，

在毋敬虔个人中間為𠊎辯護；

求你救𠊎脫離詭詐邪惡个人。

2你係庇佑𠊎个上帝；

你做麼介將𠊎放掉呢？

𠊎做麼介堵到仇敵个迫害，食恁多苦？

3求你顯出你个光㧯真理來引導𠊎，

帶𠊎轉去你个聖山錫安，

到你所住个聖所去！

4恁樣，上帝啊，𠊎愛去你个祭壇前，

去到賜𠊎歡喜快樂个上帝面前。

上帝，𠊎个上帝啊，

𠊎愛彈琴頌讚你！

5𠊎个心啊，做麼介恁傷心？

做麼介噌無停？

愛仰望上帝，再一擺頌讚佢；

佢係𠊎个救主，𠊎个上帝。