以西結書 42 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

聖殿附近个兩座屋

1該人帶𠊎到外院，入聖殿北片个一座屋；這座屋一片向聖殿个空地，一片向北片个屋。

2這座屋長五十公尺，闊二十五公尺，有向北个門。

3它一面向聖殿堘頭十公尺闊个空地，另外一面向鋪石頭个外院。這座屋有三層，上層比下層較狹。

4屋仔北片有通路，闊五公尺，長五十公尺 ，門向北片。

5最上層个間房比中層个㧯底層个較狹，因為上層个走廊比下層个走廊佔較多地方。

6這兜間房全部無柱𣎴，無像外院肚其他个屋仔需要柱𣎴來堵等，所以上層就比中層㧯下層較狹。

7-8底層个外壁長二十五公尺，房間也長二十五公尺。向等聖殿个間房長五十公尺。

9-10這兜間房下背，對東片開始，有門做得通到外院。

聖殿南片 有屋，一片向聖殿个空地，一片向南片个屋。

11房間頭前有通路，㧯北片該座屋共樣。屋个尺寸、設計、㧯門全部㧯該座共樣。

12南片該兜房間个門，㧯北片个共樣，對東牆頭開始个所在也有門做得入去。

13該人㧯𠊎講：「南片㧯北片這兜間房全部係至聖个。入去上主面前个祭司在這位食至聖个祭物。因為房間係聖个，祭司愛將至聖个祭物 — 素祭、贖罪祭、㧯贖過失祭留在該位。

14祭司入聖殿後，愛再到外院時，佢等一定愛將事奉上主時著个聖衫留在這位。佢等一定愛著別種衫褲正做得到人民聚集个所在。」

聖殿周圍个尺寸

15該人量好聖殿內部个尺寸後，就帶𠊎穿過東門，去量聖殿个四圍。

16佢用測量尺去量，東片長兩百五十公尺，

17-19又量北片、南片、西片，逐片長兩百五十公尺。

20有圍牆圍等這垤兩百五十公尺四方形个地。這圍牆將聖地㧯俗地隔開來。