1上主講：「猶大个人民啊，你等个罪係用鐵筆、用金鋼鑽刻在你等个心肚㧯你等个祭壇角面頂。
2連你等个子女也在國內个大樹下、高山頂為女神亞舍拉起祭壇㧯柱像。
3因為你等在全國逐所在犯罪，𠊎愛將𠊎田野个山、你等个財產、一切寶物 ，交給敵人搶走。
4你等一定會失掉𠊎賜給你等个土地；𠊎愛將你等逐到生份个所在去做敵人个奴才。因為你等惹𠊎發譴，使𠊎个火當著，到永遠毋會烏掉。」
上主教導个話5上主講：
信賴世間人，
倚恃人血肉个力量，
佢个心離開𠊎 — 上主个人，
這種人應該受咒詛。
6佢像沙漠中个矮樹：
生在燥旱个曠野，
在荒涼个鹽地；
看毋到繁榮个時節來到。
7專心信靠𠊎 — 上主个，
這種人樣般有福氣！
8佢像種在河壩滣个樹：
樹根伸到河壩，
毋驚熱氣、也毋驚燥旱，
樹葉穠穠，打子無停。
9人心比萬物詭詐，
壞到無好醫；
麼人看得透呢？
10𠊎 — 上主鑒察人个心腸，
試驗人个心意；
𠊎照逐儕个行為㧯佢應該受个報應佢。
11用無正當个手段發財个人，
像一隻鵓鴣仔孵毋係自家生个卵。
佢會在中年失掉財富；
到尾成做戇仔。
12𠊎等个聖殿係上主榮耀个寶座，
一開始就起在高山頂。
13上主啊，你係以色列个盼望；
離開你个人全部會見笑。
悖逆你个人，佢等會進入陰間 ，
因為佢等離開上主 — 生命水个源頭。
耶利米求上主幫助14上主啊，求你醫𠊎，𠊎就會好；求你救𠊎，𠊎就會得救。你係𠊎愛頌讚个。
15看啊，人㧯𠊎講：「上主个話在㖠位？做它來實現啊！」
16上帝啊，𠊎從來毋識求你降災禍在佢等身上 ，也無希望災難个日仔來到。這係你所知个；你明白𠊎講个話。
17求你毋好俾𠊎著驚，因為你係𠊎堵到災難時惟一个避難所。
18求你使迫害𠊎个人見笑，毋好俾𠊎見笑；求你使佢等著驚，毋好俾𠊎著驚。求你使佢等堵到災難，徹底消滅佢等。
論守安息日19上主對𠊎恁樣講：「耶利米啊，你到猶大个君王出入耶路撒冷个『人民門』去，也企在耶路撒冷逐個城門口，
20對佢等講：『猶大个君王、人民，㧯所有出入耶路撒冷這兜城門个人啊！你等愛聽上主个話。
21上主恁樣講：為到自家个生命，你等愛細膩噢！做毋得在安息日搬東西，做毋得搬運東西入耶路撒冷个城門。
22做毋得在安息日搬東西出門，做毋得做事。你等愛遵行𠊎給你等祖先个誡命，守安息日做聖日。』
23佢等个祖先毋單淨毋注意聽，反轉硬頸毋肯聽，毋肯接受管教。」
24上主講：「你等愛服從𠊎。莫在安息日搬運東西入這城。守安息日做聖日；毋做一切个事。
25恁樣，坐大衛王位个君王㧯該兜領袖就能坐戰車抑係騎馬入耶路撒冷个城門。佢等㧯猶大个人民，並所有住在耶路撒冷个人會共下入城。這城永遠會有人住。
26人民會對猶大个逐城市、耶路撒冷周圍逐村莊、便雅憫地區、西片个高原、山地，㧯猶大个南部，來耶路撒冷。佢等會帶等燒化祭、牲儀、素祭、乳香、㧯感恩祭來到𠊎 — 上主个聖殿。
27總係，你等若毋聽從𠊎个命令，毋守安息日做聖日，在安息日搬運東西入耶路撒冷个城門，𠊎就在各城門點火；火會將耶路撒冷个王宮燒掉，無人有辦法打烏。」
Who We AreWhat We EelieveWhat We Do
2025 by iamachristian.org,Inc All rights reserved.
