1 示巴女王聽到所羅門王因為上主賜福得到好名聲，就到耶路撒冷來，想用困難个問題來考佢。
2姖帶等一大群臣僕，還有一大隊駱駝載等香料、珠寶㧯盡多黃金。姖看到所羅門个時，將心中所想到个問題全部拿來問。
3所羅門王一一回答姖所有个問題，無一隻問題考倒佢。
4示巴女王聽到所羅門智慧个話，也看到佢所起个王宮，
5又看到佢桌頂豐富个食物、厥官員住个屋、王宮僕人个組織㧯所著个制服、斟酒个僕人、㧯聖殿肚獻个燒化祭，歸隻人戇掉去。
6姖對所羅門王講：「𠊎在自家个國家所聽到有關你个成就㧯智慧全部係斷真个！
7𠊎原來毋信，總係直到𠊎來這位，親眼看到這一切正相信。𠊎所聽到个還吂有一半呢！你个智慧㧯財富比別人所㧯𠊎講个超過盡多。
8你个𡜵娘細姐 還有福氣噢！服事你个人樣般恁有福氣啊！佢等有好常常在你面前聽你智慧个話！
9願上主 — 你个上帝得到讚美！佢設立你做以色列个王，表示佢樣般中意你。因為上主永遠痛惜以色列，所以設立你做佢等个王，愛你維護法律，伸張正義。」
10 示巴女王將帶來个禮物獻給所羅門王：大約有四千公斤重个黃金，盡多香料㧯寶石。所羅門王以後，毋識收過恁多个香料。
11(希蘭个船隊對俄斐運金仔來，也運來盡多檀香木㧯寶石。
12所羅門王用這兜檀香木做上主个聖殿㧯王宮个欄杆，也為樂師歌手製造豎琴㧯七弦琴。以色列從來毋識進口恁好个檀香木，直到今晡日也毋識看過恁好个。)
13 所羅門王也當慨，送示巴女王各種禮物，除了照例愛送个禮物以外，凡係示巴女王要求个，佢全部給姖。女王㧯姖个臣僕就轉示巴去了。
所羅門王个財富(歷代志下 9:13-28)14 所羅門王逐年收到兩萬三千公斤个黃金，
15另外還有生理人納个稅、貿易稅、阿拉伯該兜王進貢个禮物、㧯以色列各地區總督獻个禮物。
16 所羅門王製造兩百垤大盾牌；逐垤大約用七公斤个金仔打个。
17佢又製造三百垤細盾牌；逐垤大約用兩公斤个金仔打个。佢將這兜盾牌放在黎巴嫩林宮肚。
18 所羅門王又用象牙製造一隻大寶座，用純金包等。
19-20寶座頭前有六層段仔；逐層兩頭各有一座獅仔，總共十二座。寶座个憑背頂係圓形个，兩片个扶手各有一座獅仔。其他國家全部毋識有恁樣个寶座。
21 所羅門王所有个酒杯全部係金仔做个；所有在黎巴嫩林宮肚个碗盤全部係純金做个，毋係用銀仔做个；因為在所羅門个時代，銀仔毋係貴重个。
22所羅門王有一隊大船，㧯希蘭王个船隊共下出海；船隊三年轉來一擺，帶等金銀、象牙、猴仔㧯孔雀轉來。
23 所羅門王比世上所有个國王較富有，還較有智慧。
24全世界个人全部想愛來見所羅門，愛聽上帝賜給佢智慧个話。
25佢等逐年帶禮物給佢，像係金器、銀器、衫褲、武器、香料、馬㧯騾仔。
26 所羅門建立一隊有一千四百輛戰車㧯一萬兩千隻戰馬个騎兵隊。佢將一部份安排到耶路撒冷，其他个分駐到逐個城市。
27在佢統治期間，耶路撒冷个銀幣像石頭恁多，香柏樹也像高原个桑仔樹恁普遍。
28所羅門个生理人對慕茲黎
㧯基利家進口馬仔，29也對埃及進口戰車。佢等將馬仔㧯戰車轉賣給赫人个王㧯敘利亞人个王：戰車一輛六百隻銀幣；馬仔一隻一百五十隻銀幣。
Who We AreWhat We EelieveWhat We Do
2025 by iamachristian.org,Inc All rights reserved.
