1 約西亞个孻仔約雅敬做王統治猶大个第四年，就係尼布甲尼撒做巴比倫王个第一年，耶利米對上主領受佢愛給猶大眾人个信息。
2先知耶利米就去向猶大全國人民㧯耶路撒冷个眾人講：
3「對亞們个孻仔約西亞做王統治猶大國个第十三年到今晡日，總共二十三年，上主常常向𠊎講話，𠊎也一直向你等傳佢个話，總係你等毋聽。
4上主早就一直派佢个僕人 — 該兜先知向你等傳話，總係你等毋聽，也毋搭佢。
5佢等勸你等逐儕離開邪惡个生活，改變罪惡个行為，恁樣你等正做得永遠留在上主賜給你等㧯你等祖先个土地。
6佢等也勸你等毋好敬拜服事別个神，毋好拜你等所造个偶像來惹上主發譴，佢就毋會責罰你等。
7總係，上主宣佈講，你等毋單淨毋聽佢，反轉用自家个手所造个偶像來惹佢發譴，害到自家。
8「因為你等毋聽從佢，所以上主 — 萬軍个元帥恁樣講：
9『看啊，𠊎愛派北方該兜民族㧯𠊎个僕人巴比倫王尼布甲尼撒來攻擊這地方㧯所有个人民，也愛攻擊周圍所有个國家。𠊎愛消滅佢等，使這地方㧯周圍个國家永遠荒涼，成做害人驚到發咄愕、被人嘲謔个所在。𠊎 — 上主恁樣宣佈了。
10𠊎愛使佢等毋會再有歡喜快樂个聲，也無再有新郎㧯新娘个聲音；佢等个磨石無聲，燈盞無油。
11這片土地會荒涼，成做害人驚到發咄愕个所在。這兜國家會被巴比倫王管七十年。
12滿七十年以後，𠊎愛因為巴比倫㧯它个王所犯个罪責罰佢等。𠊎愛使佢等个地永遠荒涼。
13𠊎愛用𠊎所宣佈一切个話，就係耶利米寫在這書底背、攻擊列國个預言，來責罰巴比倫。
14𠊎愛照巴比倫人所行所做个來報應佢等；佢等會做當多強國㧯大君王个奴才。』」
上帝審判列國15上主 — 以色列个上帝恁樣㧯𠊎講：「你愛將對𠊎手中接過去、裝滿大發譴个酒杯，交給𠊎差派你去个各國，給佢等啉。
16佢等啉了以後全部會偏來偏去，像發酒癲，因為𠊎愛用戰爭來對付佢等。」
17所以，𠊎對上主手中接過這酒杯，將它交給上主派𠊎去个各國，給佢等啉。
18𠊎給耶路撒冷、猶大該兜城市，連它兜个君王、官員全部啉這酒，使它兜成做荒涼、害人驚到發咄愕、被人嘲謔、咒詛个對象。 (今晡日个情形也係共樣。)
19-26下背所列个也全部應該啉這酒：
埃及王，佢个官員㧯領袖；
所有埃及人㧯住在埃及个外國人；
烏斯所有个君王；
非利士該兜城市：亞實基倫、迦薩、以革倫所有个君王，㧯亞實突賸到个人民；
以東人、摩押人，㧯亞捫人；
泰爾㧯西頓所有个君王；
地中海該片个君王；
底但、提瑪，㧯布斯該兜城市个人；
所有修剪頭那毛來尊敬神明个民族；
阿拉伯所有个君王；
沙漠地區各部落个族長；
心利、以攔，㧯米底亞所有个君王；
北方遠近所有个君王。
地上各國全部愛啉這酒。最後，巴比倫王 也愛啉這酒。
27接等，上主對𠊎講：「你愛㧯佢等講，𠊎 — 上主、萬軍个元帥、以色列个上帝命令佢等啉這杯酒，俾佢等酒醉，盡嘔，橫落去，爬毋起來，因為𠊎使佢等堵到戰爭。
28若係佢等毋肯對你个手接這杯去啉，你就㧯佢等講：上主 — 萬軍个元帥恁樣講：『你等一定愛啉。』
29因為𠊎愛先毀滅𠊎自家个城，佢等還閃得開責罰嗎？佢等閃毋開，一定愛受責罰，因為𠊎愛用戰爭消滅地上所有个人民。𠊎 — 上主、萬軍个元帥恁樣宣佈了。
30-31「耶利米啊，你一定愛將𠊎㧯你講个話全部㧯佢等講：
上主愛對天頂像獅仔吼吼滾，
對佢个聖所發出大發譴个聲，
向佢个子民大聲咄，
像踏葡萄个人緊踏緊喊。
佢个聲音傳到天邊海角；
地上所有个人全部聽得到。
上主愛告列國。
佢愛審判萬民，
將壞人交給刀劍。
上主恁樣宣佈了。」
32上主 — 萬軍个元帥恁樣講：災難會來了，對這國到另外一國，像對地極吹一陣大狂風。
33該日，對地球个這片到另外一片，到處係被上主㓾掉个人个身屍。無人為佢等悲傷，無人收屍，也無人埋佢等。佢等个身屍分散在地面上，成做糞堆。
34人民个領袖啊，𠊎子民个牧者啊，你等愛大聲噭，在地泥下緊碾。你等被人㓾个時間會到了；你等會像羊牯被人㓾 ，
35連一個牧者也無法度逃走。
36-37你這兜牧者會大聲盡噭，因為上主愛在大發譴之下消滅你等个國家，使你等安樂个牧場變做荒埔。
38上主離開佢个子民 ，像獅仔離開牠个窿。戰爭个得人驚㧯上主个大發譴使這個國家變做荒埔。
Who We AreWhat We EelieveWhat We Do
2025 by iamachristian.org,Inc All rights reserved.
