詩篇 141 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

暗晡時个祈禱 大衛个詩。

1上主啊，𠊎求喊你；

遽遽來幫助𠊎！

𠊎求喊你个時，求你側耳垂聽𠊎个聲！

2願𠊎个祈禱像燒香个煙衝到你面前；

願𠊎擎手祈禱，像係臨暗仔獻个祭。

3上主啊，管制𠊎个嘴；

求你守等𠊎个嘴孔。

4毋好使𠊎个心歪走，

莫㧯作惡个人共下做壞事；

禁止𠊎參加佢等个筵席。

5𠊎甘願接受義人愛心个責打；

總係𠊎毋肯接受壞人个尊敬，

反轉常在祈禱中反對佢等个壞行為。

6佢等个領袖被人抨落山巖下个時，

大家就會承認𠊎所講个話係真實。

7佢等个骨頭會被人㧒在塚埔堘，

像係斬斷破碎个柴散到滿地 。

8總係，至高个上主啊，

𠊎个目珠仰望你；

𠊎尋求你个庇佑；

求你毋好放掉𠊎！

9求你毋好俾𠊎陷入佢等个機關；

救𠊎脫離該兜壞人所挖个陷阱。

10願壞人陷落自家个羅網，

𠊎就有好平平安安經過。