1下背係有關埃及个信息。
看啊，上主坐當遽个雲到埃及來。埃及个偶像在佢面前愊愊掣；埃及个人民會驚到無半點勇氣。
2上主講：「𠊎愛激埃及發生內戰，使兄弟打兄弟，鄰舍打鄰舍，城市㧯城市相㓾，王㧯王戰爭。
3𠊎愛使埃及人个心神混亂、計謀失效。佢等會向偶像求幫助，求問變邪術个、算命先生㧯鬼魂。
4𠊎愛將埃及人交給一個暴君；一個當殘忍个王愛來管理佢等。𠊎 — 至高个上主、萬軍个元帥恁樣宣佈了。」
5 尼羅河个水位會降低，河壩燥掉。
6埃及个運河㧯河壩因為燥掉就發出臭味，蘆竹㧯燈心草也枯燥；
7尼羅河兩片河壩滣个農作物燥掉，被風吹淨淨。
8在尼羅河壩滣靠打魚生活个人全部會傷心到面憂憂；佢等个釣梹㧯魚網全部用毋到。
9紡麻紗㧯織棉布个人全部會失望；
10紡織工人㧯其他有技術个工人一個一個失業。
11 瑣安城个領袖盡戇！埃及王最聰明个參謀也無麼介好辦法！佢等樣敢在國王面前講自家係古代學者㧯君王个子孫呢？
12埃及王啊，你該兜聰明个顧問走㖠去了？無一定佢等會㧯你講，上主 — 萬軍个元帥對埃及有麼介計劃！
13瑣安㧯孟斐斯个領袖全部係戇仔，佢等應該領導國家，總係佢等𢱋毋著路。
14上主使佢等講出糊塗个主張，致到埃及所做个事全部毋著；國家無安定，像一個食酒醉个人在自家嘔出來个垃圾底背打盪溜。
15在埃及，無論係好額个、窮苦个、高貴个、卑賤个，無一個有辦法。
埃及會敬拜上主16到該時，埃及个男人會像婦人家恁無膽。佢等看到上主 — 萬軍元帥个手擎起來愛責罰佢等，就全部愊愊掣無葛無煞。
17埃及人一想到猶大國，就全部盡著驚。這係因為上主 — 萬軍个元帥樣般安排埃及人个命運。
18該日仔一到，埃及个五隻城市全部會講希伯來話。它兜个人民會奉上主 — 萬軍元帥个名發誓。其中一個城會安到「日頭城」。
19該日仔一到，埃及地中會有一座為上主起个祭壇；埃及个邊界會有為上主頓个石𣎴。
20這兜全部係代表上主 — 萬軍个元帥住在埃及人當中个記號。佢等受到欺負、向上主求幫助个時，上主會差派一個拯救者又係保護者來救佢等。
21上主愛向埃及人顯明，使埃及人承認佢，敬拜佢，獻牲儀㧯祭物給佢。佢等會在佢面前還願。
22上主愛責罰埃及人，也愛醫治佢等。佢等會倒轉來歸屬上主。佢會聽佢等个祈禱，醫治佢等。
23該日仔一到，埃及透到亞述會有一條大路。兩國个人民來往旅行；埃及人㧯亞述人會共下敬拜上主。
24該日仔一到，以色列會㧯埃及、亞述平等；這三大國會使全世界人民得到福氣。
25上主 — 萬軍个元帥愛賜福它兜，講：「埃及 — 𠊎个子民，亞述 — 𠊎創造个，以色列 — 𠊎个產業，𠊎愛賜福給你等！」
Who We AreWhat We EelieveWhat We Do
2025 by iamachristian.org,Inc All rights reserved.
