1所以，𠊎這因為事奉主成做囚犯个，勸話你等：行事為人應當愛合上帝呼召你等來得到个身份。
2你等愛謙卑、溫柔、忍耐，用愛心互相寬容，
3用和平彼此結連，盡力保持聖靈所賜合一个心。
4只有一個身體，只有一位聖靈；像上帝呼召你等个時，你等只有一個盼望。
5只有一位主，一個信仰，一個洗禮。
6只有一位上帝，就係人類个阿爸；佢超越萬有，在萬有中間，也在萬有底背。
7𠊎等逐個人攏總照基督所分配个，領受特別个恩賜。
8像聖經所講：
佢升上去到高高个所在，
帶等盡多捉來个仇敵；
佢將各樣个恩賜賜給人。
9(「佢升上去」這句話係麼介意思呢？這就係講：佢識先降下來，到地最深个所在。
10該「降下來」又「升上去」到諸天頂高个係共一儕；佢恁樣做係愛充滿萬有。)
11佢也係該「將各樣个恩賜賜給人」个；佢指定有兜人做使徒，有兜人做先知，有兜人做傳福音个，有兜人做牧師抑係教師；
12目的係愛裝備眾聖徒做事奉个工作，來建立教會，就係基督个身體，
13直到𠊎等眾人對上帝个孻仔有共樣个信仰㧯認識，長大成人，滿有基督成熟个樣式。
14恁樣，𠊎等正毋會再像細人仔，陷落人所設奇巧个詭計，跈等各樣个學說走，像被風浪漂來打去。
15顛倒，𠊎等愛用愛心講實話，在各方面一直長進到像基督。佢就係頭；
16全身攏總倚靠佢，通過關節㧯筋骨來互相配合，彼此連結。恁樣，當各肢體个功效發揮个時，身體就會在相惜个當中漸漸長大，越來越勇健。
基督底背个新生命17𠊎這下奉主个名勸你等：毋好再像外邦人過該種个生活。佢等所想个係無利益个事，
18佢等个心肝烏暗，佢等已經同上帝所賜个生命隔斷了；因為佢等無頭腦又硬殼。
19佢等毋知見笑，放縱情慾，隨心所愛去行各種敗德个事情。
20總係，你等學習基督就毋係恁樣！
21你等若係有影聽到佢个事，做佢个信徒，又學過在耶穌底背正有个真理，
22恁樣，你等就愛脫掉該使你等生活在腐敗中个舊人；舊人係因為私慾个誘惑來腐敗掉个。
23你等个心思意念愛換新，
24愛將新人著起來；新人係照上帝个形像造个，通過真理个生活來表明正義㧯聖潔。
25所以，你等毋好再講花撩！逐儕對鄰舍應當講實話，因為𠊎等攏總係基督身體个肢體。
26你等若發譴，毋好因為恁樣來犯罪；也毋好閼到日頭落山；
27毋好留機會給魔鬼來害你。
28頭擺做賊个，毋好再偷拿；愛靠自家个雙手認真做事，正會有能力幫助窮苦人。
29講話毋好傷人，愛講對人有幫助、造就人个話，使聽到个人得到利益。
30毋好使上帝个聖靈憂愁；因為聖靈係你等屬上帝个印記，保證上帝釋放你等个日仔會到。
31你等愛除掉一切个惡毒、怨恨，㧯憤怒。毋好再冤家抑係譭謗；做毋得再有麼介冤仇。
32愛用慈悲㧯憐憫个心互相好款待，彼此赦免，像上帝通過基督赦免你等一樣。
Who We AreWhat We EelieveWhat We Do
2025 by iamachristian.org,Inc All rights reserved.
