1上主講：「該兜迫害逐走𠊎子民个統治者慘了！佢等就像牧人迫害逐走𠊎个羊群共樣。」
2上主 — 以色列个上帝對該兜牧人恁樣講：「你等原來應該照顧𠊎个羊群，反轉逐散佢等。看啊，𠊎愛因為你等个壞行為責罰你等。
3𠊎愛將𠊎羊群中所賸到个子民，對𠊎逐散佢等去个各國召集起來，帶佢等轉來故鄉。佢等會多子多孫，人數增加盡多。
4𠊎愛派牧人正經照顧佢等。𠊎个羊仔毋會再著驚；佢等連一個也毋會失掉 。𠊎 — 上主恁樣宣佈了。」
5上主講：「看啊，日仔會到，𠊎愛為大衛興起正義个『樹枝』。佢个王權賢明；佢愛在這垤土地用公平正義治理國家。
6在佢統治个日仔，猶大人民會安居樂業，以色列人民會享受太平。佢會稱做『上主 — 𠊎等个正義』。」
7上主講：「看啊，日仔會到，人發誓个時，毋會再講：『𠊎指等該帶領以色列人出埃及个永生上主發誓』，
8總係愛講：『𠊎指等該帶領以色列人个後代離開北方个土地，離開佢逐散佢等去个各國个永生上主發誓。』該時，佢等會在自家个故鄉安居樂業。」
對假先知个警告9論到該兜假先知，
𠊎个心破碎；
𠊎全身愊愊掣。
上主㧯佢神聖个話使𠊎像酒醉个人，
使𠊎像被人用盡多酒灌到醉醉个人。
10這土地滿遍係對上主無忠心个人。
佢等將權力拿來亂用，
所行所做也當積惡。
因為上主个咒詛，
土地荒涼，牧場枯燥。
11上主講：
先知㧯祭司攏總全無敬虔；
就係在𠊎聖殿肚，𠊎也看到佢等做壞事。
12佢等行个路又滑又暗；
𠊎愛使佢等溜到橫倒。
佢等受責罰个時間到了；
𠊎愛降災難在佢等身上。
𠊎 — 上主恁樣宣佈了。
13𠊎看到撒馬利亞該兜先知个罪過：
佢等奉巴力神明个名講預言，
使𠊎个子民以色列行差路。
14𠊎看到耶路撒冷該兜先知還較壞：
佢等行姦淫、講花舌，
唆慫人做壞事；
所以無人棄邪歸正。
在𠊎看來佢等全部㧯所多瑪人共樣恁壞，
㧯蛾摩拉人共樣腐敗。
15所以，論到耶路撒冷該兜先知，𠊎 — 上主、萬軍个元帥恁樣講：
𠊎愛使佢等食苦果，啉毒水，
因為佢等使全國流傳無敬虔个風俗。
16上主 — 萬軍个元帥對耶路撒冷人民恁樣講：「毋好聽信這兜先知个話；佢等給你等个係假个希望。佢等憑自家个妄想講預言，毋係傳講𠊎个話。
17佢等一直對該兜藐視𠊎个人講：『上主講，你等會平安無事！』又對該兜硬頸个人講：『你等毋會堵到災難。』」
18 耶利米講：「其實，這兜先知中，有麼人識企在上主个天庭親身聽佢講話呢？有麼人認真聽佢个話呢？
19看啊，上主个大發譴會像狂風發生，像龍捲風恁樣在壞人頭那頂捩捩轉。
20上主个憤怒毋會收轉去，直到佢完成自家所有个計劃；該時，你等正會完全明白這個事。」
21上主講：「𠊎無派這兜先知，係佢等自家走去个；𠊎無給佢等信息，總係佢等用𠊎个名講預言。
22若係佢等識像企在𠊎个天庭恁樣接受𠊎个話，佢等就會向𠊎个子民傳講𠊎个信息，使佢等離開邪惡个路，毋做壞事。」
23上主恁樣講：「𠊎係無所不在个上帝。
24無人有辦法囥起來，使𠊎看佢毋到。無論在天涯海角，𠊎 — 上主攏總在該位。
25𠊎聽到該兜先知用𠊎个名騙人，佢等自家講係在夢中得到𠊎个信息。
26該兜先知講花撩，照自家心中个詭詐來騙人；佢等愛騙到幾時呢？
27佢等將自家發个夢互相傳來傳去，愛使𠊎个子民毋記得𠊎，就像佢等个祖先因為巴力毋記得𠊎。
28發夢个先知應該講佢係發夢定定；總係聽到𠊎信息个先知應該忠實來傳講𠊎个信息。禾稈㧯麥仔樣般比抑得呢？
29𠊎个信息像當猛个火，也像打碎巖石个大鐵鎚。
30所以，𠊎 — 上主恁樣講：聽啊，𠊎愛對付這班先知。佢等大家拿對方个話，準做𠊎个話來傳講。
31聽啊，𠊎愛對付這班先知。佢等也將自家講个話當做𠊎个話。
32聽啊，𠊎愛對付這班先知。佢等个夢全部係騙人个。佢等講起這兜夢，用花撩㧯誇口个話將𠊎个子民帶入差路。𠊎並無派佢等，也無吩咐佢等。佢等對𠊎个子民全無好處。𠊎 — 上主恁樣宣佈了。」
上主个重擔33上主對耶利米講：「若係𠊎个子民，抑係先知，抑係祭司問你：『上主有麼介默示？』你愛㧯佢講：『你等就係上主个重擔 ；佢愛將你等㧒掉。』
34若係有先知、祭司，抑係𠊎个子民用『這係上主个默示』這句話，𠊎就愛責罰佢㧯佢全家个人。
35逐儕應該問佢个鄰舍㧯兄弟：『上主樣般回答？上主講麼介？』
36佢等做毋得再過用『這係上主个默示』這句話；麼人再過用，𠊎就將𠊎个默示變做佢个重擔！佢等恁樣就係糮糝用佢等个上帝 — 上主、萬軍个元帥、永生上帝个話語了。
37耶利米啊，你愛問該班先知：『上主應你等个係麼介？上主向你等講麼介？』
38若係佢等違背𠊎个命令，用『這係上主个默示』這句話，你就㧯佢等講，
39𠊎一定會將佢等準做重擔擎起來 ，將佢等連𠊎賜給佢等㧯佢等祖先个城市全部對𠊎面前㧒出去。
40𠊎愛使佢等永久見笑，永遠受侮辱，係無辦法毋記得个侮辱。」
Who We AreWhat We EelieveWhat We Do
2025 by iamachristian.org,Inc All rights reserved.
