歷代志下 30 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

預備過𨃟過節

1-3民眾來毋掣在第一隻月慶祝𨃟過節，因為禮儀上淨浰个祭司毋罅，又有盡多人還吂到耶路撒冷，所以希西家王㧯該兜領袖，並耶路撒冷人民同意第二隻月慶祝𨃟過節。希西家派人通知全部以色列人㧯猶大人，又特別寫信給以法蓮支族㧯瑪拿西支族，邀請佢等到耶路撒冷上主个聖殿共下慶祝𨃟過節，敬拜上主 — 以色列个上帝。

4王㧯人民全部滿意這個計劃。

5所以佢等邀請所有个以色列人，對南部个別是巴到北部个但，共下到耶路撒冷來，照法律个規定慶祝𨃟過節，敬拜上主 — 以色列个上帝；因為盡多人民已經無照所記載个規定來守這節。

6送信个人奉王㧯該兜領袖个命令出去，將這封邀請信送到猶大㧯以色列逐所在；內容係：

「以色列个人民啊，在亞述皇帝來侵犯个時，上主無俾你這兜賸下來个人受到災難。你等愛轉向上主 — 亞伯拉罕、以撒、以色列个上帝，佢就會轉向你等。

7毋好學你等个阿爸㧯兄弟；佢等對上主 — 佢等祖先个上帝無忠心。就像你等所看到个，上帝嚴嚴責罰佢等。

8毋好像佢等恁硬頸；愛順服上主。你等愛到耶路撒冷个聖殿來，這係上主 — 你等个上帝永遠聖潔个所在。你等來敬拜佢，佢就毋會再向你等發譴。

9若係你等轉向上主，該兜捉走你等親人个人就會憐憫佢等，俾佢等轉來。上主 — 你等个上帝係慈愛、滿有憐憫个。你等轉向佢，佢就接納你等。」

10送信个人去到以法蓮㧯瑪拿西地區逐所在，甚至到北片西布倫支族个逐城。總係該位个人恥笑佢等，侮辱佢等。

11總係亞設、瑪拿西、西布倫支族中也有人謙卑下來，願意到耶路撒冷來。

12上帝也在猶大人中做工，使佢等同心遵行佢个旨意，來聽王㧯該兜領袖个命令。

慶祝𨃟過節

13盡多人在第二隻月聚集在耶路撒冷慶祝除酵節。

14佢等將耶路撒冷逐位獻祭燒香个祭壇全部㧹落汲淪溪肚。

15第二隻月十四日，佢等㓾細羊做𨃟過節个牲儀。該兜無淨浰个祭司㧯利未人感覺見笑，就潔淨自家，將燒化祭帶到上主个聖殿。

16佢等照神人摩西在法律上个指示，企在聖殿佢等應該企个位仔。利未人將牲儀个血拿給祭司，祭司就將血洒在祭壇頂。

17盡多人因為照禮儀上無淨浰，做毋得自家㓾𨃟過節个細羊仔，所以利未人代佢等㓾，將細羊仔獻給上主。

18另外，盡多對以法蓮、瑪拿西、以薩迦、西布倫支族來个人無潔淨自家，就食𨃟過節个細羊仔；這係無合規定个。所以，希西家為佢等恁樣祈禱講：

19「慈悲个上主 — 𠊎等祖先个上帝啊，請赦免該兜雖然照聖所規定無淨浰、總係全心全意尋求你个人。」

20上主聽希西家个祈禱，就赦免 佢等。

21聚集在耶路撒冷个民眾歡歡喜喜來慶祝除酵節，連等七日。逐日，利未人㧯祭司用當響个樂器 頌讚上主。

22希西家稱讚利未人，因為佢等當會帶領人民敬拜上主。

又慶祝一擺

民眾食照規定个筵席，又獻平安祭，並讚美上主 — 佢等祖先个上帝。過七日，

23大家決定再慶祝七日；所以佢等又快樂慶祝。

24猶大王希西家捐出一千隻牛牯㧯七千隻綿羊給民眾㓾來食；該兜領袖另外又捐出一千隻牛牯㧯一萬隻綿羊。盡多祭司潔淨自家。

25猶大人民、祭司、利未人、北部以色列來个民眾、㧯住在以色列㧯猶大个外族人，大家全部當快樂。

26耶路撒冷充滿歡喜；因為對以色列王大衛个孻仔所羅門以來毋識恁樣。

27祭司㧯利未人祈求上主賜福人民。上帝在天頂佢个聖所聽佢等个祈禱，接受佢等个祈求。