申命記 27 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上帝个法律寫在石頭頂

1 摩西㧯以色列該兜長老吩咐人民講：「你等愛遵守𠊎今晡日向你等頒佈所有个命令。

2你等過約旦河，入到上主 — 你等个上帝賜給你等个土地該日，愛頓幾垤大石頭起來，面頂抹石灰，

3將這所有个法律㧯教訓全部寫上去。你等入到上主 — 你等祖先个上帝所應許給你等該流乳㧯蜜盡肥个土地、

4踏上約旦河西片後，愛照𠊎今晡日頒給你等个命令在以巴路山頂將這兜大石頭頓起來，面頂抹石灰。

5你等在該位也愛拿無用鐵器鑿過个石頭，為上主 — 你等个上帝起一個祭壇。

6為上主 — 你等个上帝起个祭壇，愛用無鑿過个石頭。你等愛在祭壇頂將燒化祭獻給上主 — 你等个上帝；

7也愛在該位獻平安祭、食平安祭，在上主 — 你等个上帝面前歡喜快樂。

8你等愛在抹石灰个大石頭面頂將這所有个法律㧯教訓全部清清楚楚寫上去。」

9接等，摩西㧯利未支族該兜祭司對以色列全會眾講：「以色列人哪，愛安靜，認真聽𠊎个話。你等今晡日已經成做上主 — 你等上帝个子民。

10所以，你等愛聽從佢，確實遵行𠊎今晡日向你等頒佈个所有法律誡命。」

違背誡命會受咒詛

11該日，摩西又命令人民講：

12「你等過約旦河以後，西緬、利未、猶大、以薩迦、約瑟、便雅憫這兜支族愛企在基利心山頂為人民祝福；

13呂便、迦得、亞設、西布倫、但、拿弗他利這兜支族愛企在以巴路山頂宣佈咒詛。

14利未支族該兜祭司愛大聲向以色列全會眾宣佈：

15「『所有用石頭、樹仔，抑係金器造偶像、偷偷仔拜，一定會受咒詛，因為上主盡惱人拜偶像。』

「全會眾愛應講：『阿愐！』

16「『無孝敬爺𡟓个，一定會受咒詛。』

「全會眾愛應講：『阿愐！』

17「『徙鄰舍地界个，一定會受咒詛。』

「全會眾愛應講：『阿愐！』

18「『佻佻𢱋瞙目个行差路个，一定會受咒詛。』

「全會眾愛應講：『阿愐！』

19「『侵犯外族人、孤兒㧯寡婦權利个，一定會受咒詛。』

「全會眾愛應講：『阿愐！』

20「『㧯後𡟓同房、侮辱阿爸个，一定會受咒詛。』

「全會眾愛應講：『阿愐！』

21「『㧯動物發生性關係个，一定會受咒詛。』

「全會眾愛應講：『阿愐！』

22「『㧯親姊妹 (包含共爺無共𡟓抑係共𡟓無共爺个姊妹) 同房个，一定會受咒詛。』

「全會眾愛應講：『阿愐！』

23「『㧯丈人𡟓同房个，一定會受咒詛。』

「全會眾愛應講：『阿愐！』

24「『暗中㓾人个，一定會受咒詛。』

「全會眾愛應講：『阿愐！』

25「『被人收買去㓾無罪个，一定會受咒詛。』

「全會眾愛應講：『阿愐！』

26「『毋確實遵守這兜法律㧯教訓个，一定會受咒詛。』

「全會眾愛應講：『阿愐！』」