耶利米書 33 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

重申復國个應許

1 耶利米還關在禁衛隊个拘留所个時，上主第二擺㧯佢講。

2創造大地个係上主，使萬有成形又得到建立个也係上主。佢个名係上主。佢恁樣講：

3「你求𠊎，𠊎就應你；𠊎愛將你所毋知該兜當大又難明白个事㧯你講。

4𠊎 — 上主、以色列个上帝講：耶路撒冷城肚个屋㧯猶大个王宮，為到抵擋敵人攻城个土堆㧯刀劍，就被人拆掉。

5有兜人出城去對抗巴比倫人；巴比倫人愛將𠊎在大發譴之下所㓾死个人个身屍堆滿這兜屋 。因為城肚个人所做个壞事，𠊎就揞面毋看顧這城。

6總係，看啊！𠊎愛醫治這城个人民，使佢等恢復健康。𠊎還愛俾佢等享受和平㧯安全。

7𠊎愛將被人捉走个猶大㧯以色列人民帶轉故鄉，重整家園；

8𠊎愛洗淨佢等得罪𠊎所犯一切个罪過，赦免佢等悖逆𠊎个一切个罪惡。

9耶路撒冷會使𠊎有好名聲，帶給𠊎快樂、尊重㧯榮光。世界各國聽到𠊎賜福給耶路撒冷人民，使這城重新繁榮个時，全部會驚到愊愊掣。」

10上主恁樣講：「你等全部講這垤土地會成做荒地，無人，也無動物。無毋著！猶大逐座城㧯耶路撒冷个大街小巷全部會荒掉，無動物，也無人住。總係你等愛在這兜所在再一擺聽到

11有歡喜快樂个聲、新郎㧯新娘个聲。你等也會聽到人在聖殿肚獻感恩祭个歌聲；佢等會唱：

『愛感謝上主 — 萬軍个元帥！

因為上主係至善；

佢个慈愛永遠長存。』

𠊎愛俾你等轉到故鄉，重整家園。𠊎 — 上主恁樣宣佈了。」

12上主 — 萬軍个元帥恁樣講：「在這垤荒廢、無人無動物个土地，所有个城市定著會再有牧場，牧人使羊群在該位休息。

13在山區个鄉鎮、西片高原个村莊、猶大南部逐所在、便雅憫地區逐所在、耶路撒冷周圍个村莊、㧯猶大地逐座城，牧人會再一擺點算佢等个羊。𠊎 — 上主恁樣宣佈了。」

14上主講：「看啊，時節會到了，𠊎愛實現𠊎對以色列㧯猶大人民好个應許。

15該時，𠊎愛為大衛興起正義个『樹枝』；佢會在這片土地用公平正義來統治國家。

16該時，猶大人民一定會得救，耶路撒冷人會安居樂業。這城會被人安做『上主 — 𠊎等个正義』。

17𠊎 — 上主恁樣應許：大衛个後代會永遠有人坐以色列个王位；

18做祭司个利未人也一定會有人在𠊎面前獻燒化祭、素祭，日日辦理獻祭个事。」

19上主㧯耶利米講：

20「𠊎 — 上主恁樣講：你等若係有辦法廢掉𠊎㧯日時頭並暗晡頭立个約，使日夜無照時運轉，

21恁樣，𠊎㧯𠊎个僕人大衛立个約正做得廢掉，使佢个後代無人坐王位；還有𠊎㧯做祭司服事𠊎个利未人立个約，正做得廢掉。

22𠊎愛使𠊎僕人大衛个後代㧯做祭司服事𠊎个利未人數目增加，像天頂个星仔無法度算，像海滣个沙仔無法度量。」

23上主㧯耶利米講：

24「你知麼？有人恁樣講：『上主㧒掉自家揀選个兩隻國家 — 以色列㧯猶大。』這兜人恁樣藐視𠊎个子民，無將佢等看做國家。

25總係，𠊎 — 上主恁樣講：𠊎若無㧯日夜立約，無設立天地个定律，

26𠊎就會拒絕雅各个後代㧯𠊎僕人大衛个後代；無對大衛个後代選立君王，管理亞伯拉罕、以撒㧯雅各个後代。總講，𠊎愛憐憫佢等，俾佢等轉到故鄉，重整家園。」