創世記 47 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1-2 約瑟對佢个兄弟中選出五儕來，帶佢等去見王。約瑟入去㧯王講：「吾爸㧯吾兄弟已經帶等佢等个牛羊㧯一切所有个對迦南來了，佢等這下留在歌珊地區。」然後佢帶該五儕去到王面前。

3王問佢等：「你等做麼介頭路？」

佢等應講：「王啊！若僕人係牧羊人，𠊎等个祖先乜共樣。」

4佢等又對王講：「因為迦南地區飢荒嚴重，𠊎等个羊群無草好食，所以𠊎等就徙到這位來。這下，求王准若僕人住在歌珊地區。」

5王對約瑟講：「這下若爸㧯若兄弟到你這位來了。

6埃及个土地在你等面前，由在佢等選；佢等可以住在國內最好个地區歌珊。佢等當中若有能力較強个人，就派佢等管理𠊎个頭牲。」

7 約瑟帶厥爸雅各來到王面前。雅各㧯王祝福。

8王問雅各：「你有幾多歲？」

9 雅各應佢講：「𠊎在世間做旅客已經有一百三十年了。𠊎一生个日仔又短又苦，毋像𠊎祖先做旅客个年日恁長。」

10愛離開个時，雅各又㧯王祝福，正對王面前出去。

11約瑟就照王个命令將厥爸㧯該兜兄弟安頓在埃及，將蘭塞城附近、國內最好个土地給佢等做產業。

12約瑟又俾厥爸、佢該兜兄弟㧯所有个家族得到糧食个配給，連最細个也有一份。

飢荒

13飢荒非常嚴重，逐所在攏總無糧食；埃及人㧯迦南人全部餓到會死。

14埃及人㧯迦南人來糴糧个錢，約瑟全部收起來，交到王宮去。

15後來埃及人㧯迦南人所有个錢用淨淨，埃及人民攏總來見約瑟，要求佢講：「𠊎等个錢全部用掉了，請給𠊎等糧食，免得𠊎等餓死！」

16 約瑟應講：「錢若係用掉，做得帶你等个頭牲來換糧食。」

17所以佢等將頭牲帶到約瑟該位，約瑟就用糧食來交換佢等个馬、羊仔、牛、驢仔。該年，佢用囤糧換到民間所有个頭牲。

18第二年，佢等又來要求：「大人啊！𠊎等無騙你，𠊎等正經無錢了，頭牲也歸你了。這下除掉𠊎等个身體㧯土地以外，麼介乜無了。

19求你代𠊎等做主，免得𠊎等餓死、𠊎等个田地也荒掉。求你用糧食換𠊎等个土地，𠊎等个土地歸給王，𠊎等願意做王个奴才，代佢耕種。求你給𠊎等糧食，俾𠊎等生存下去；給𠊎等種子，𠊎等正有法度耕種。」

20因為飢荒越來越嚴重，埃及人迫到無辦法，攏總將土地賣給王；約瑟就代王將埃及所有个土地買過來。

21有關人民，約瑟使埃及國內个人攏總成做奴才 。

22只有祭司个土地佢無收買，因為佢等對王領受生活費，毋使賣土地。

23約瑟對人民講：「既然𠊎這下已經代王買下你等㧯你等个土地，𠊎就供給種子俾你等耕種。

24收割个時，你等愛將收成个五分之一交給王，其他个歸你等自家㧯屋下人做糧食，也做得拿去做種子。」

25佢等應講：「大人啊！你救𠊎等个生命，恩待𠊎等，𠊎等甘願做王个奴才。」

26這係約瑟為埃及所制定个法律：所有收成个農產，五分之一愛歸給王。這法律到今晡日還有效，只有祭司个土地毋係王个。

雅各最後个要求

27 以色列人住在埃及个歌珊地區。佢等在該位興旺發達，人口增加盡多。

28雅各在埃及住十七年，食到一百四十七歲。

29以色列死期近个時，佢就派人去喊約瑟來，對佢講：「若係你有孝心，就將手放在𠊎兩支大腳髀中間，對𠊎發誓，你毋好將𠊎葬在埃及。

30𠊎㧯祖宗同睡个時，你愛將𠊎帶出埃及，葬在佢等埋葬个所在。」

約瑟講：「𠊎一定會照你个吩咐去做。」

31 雅各講：「對𠊎發誓啊！」約瑟就對佢發誓；後來以色列在眠床頂感謝上帝。