1「做毋得將有缺點个牛羊獻給上主 — 你等个上帝，因為該係佢所惱个。
2-3「在上主 — 你等个上帝所賜給你等住个城肚，若係有男人抑係婦人家得罪上主，離開佢个約，違背佢个禁令，去敬拜服事別个神明，抑係拜日頭、月光、星辰，
4你等若聽到這種事，就一定愛徹底調查追究。若係這種壞事確實在以色列中發生，
5你等一定愛將該男人抑係婦人家拉到城門外，用石頭㧹死。
6總係你等愛有兩個抑係兩個以上个證人控告佢，正做得處死佢；你等做毋得單靠一個人做見證就處死佢。
7做證人个愛先㧹石頭，眾人正跈等佢㧹石頭。恁樣，正能對你等當中除掉這種壞事。
8「有兜案件可能係地方上个審判官盡難裁決个，像財產个糾紛、傷害个案件、分辨謀殺抑係誤殺个案件。若係有這種个案件，你等一定愛拿到上主 — 你等个上帝所選个所在，
9交給值班个利未祭司㧯審判官去裁決。
10佢等在上主所選个所在裁決以後，你等就愛遵照佢等个指示認真執行。
11愛完全照佢等个指教，照佢等个裁決去執行，做毋得偏離左右。
12麼人違抗該值班在上主 — 你等上帝面前个祭司抑係審判官个裁決，就愛處死刑。恁樣，你等就能對以色列中除掉這種壞事。
13人民聽到正會驚；無人敢再做這種壞事。」
設立王个條例14「你等佔領上主 — 你等个上帝愛賜給你等个土地，在該位安居之後，若係決定愛像周圍个國家共樣有自家个王，
15就一定愛設立上主 — 你等个上帝所揀選个人。你等一定愛設立自家个同胞做王，做毋得設立外族人。
16王做毋得為自家增加戰馬；也做毋得派人倒轉埃及買馬 ，因為上主識吩咐你等講：『做毋得再轉去埃及。』
17王做毋得增加王妃，免得受引誘離開上主；也做毋得為自家積存金銀，貪愛財富。
18王登基以後，就愛對該兜利未祭司拿這法律書，為自家抄寫一份。
19王愛將這卷書放在身邊，一生人常常讀，煞猛學習樣般敬畏上主 — 佢个上帝，確實遵行這法律書底背所記載一切个法律㧯誡命。
20恁樣，佢就毋會驕傲、看輕同胞，也毋會違背上主个命令，偏差左右。佢正會統治久久；佢个子孫也會繼續統治以色列。」
Who We AreWhat We EelieveWhat We Do
2025 by iamachristian.org,Inc All rights reserved.
