1 約伯應講：
2你等確實係最有智慧个人噢！
你等一死，智慧就會共下滅掉！
3總係𠊎㧯你等共樣有聰明，
𠊎个智慧並毋會較輸你等。
你等所講个，有麼人毋知呢？
4這下連𠊎个朋友也嘲謔𠊎；
𠊎正直清白，佢等還嘲謔𠊎；
總係上帝也識聽𠊎个祈禱。
5無災禍个人看輕堵到災禍个人；
這種人常常打擊該會跌倒个人。
6強盜个帳篷反轉穩固，
惹上帝發譴个人反轉平安；
佢等將本事準做神明 。
7你去請教走獸，牠兜會教你；
你去問空中个飛鳥，牠兜會㧯你講。
8就係㧯大地講，它也會教你，
海肚个魚仔也會㧯你說明。
9係上主个手創造牠兜，
牠兜當中敢有毋知个？
10生物个命全部在上帝个手中；
人个透氣也在佢个掌管之中。
11耳公愛分別話語个內容，
就像舌乸試食物个滋味。
12-13老年人有智慧，
總係上帝有智慧又有能力。
老人家有見識，
總係上帝有見識又有實行个能力。
14上帝拆掉个，麼人有辦法重建？
佢關禁个人，麼人有辦法釋放？
15上帝毋落雨，就會有天旱；
佢放開水源，地就做大水。
16上帝有權能，從頭到尾贏過一切；
騙人个㧯被人騙个，全在佢手中。
17佢搶走謀士个智慧，
又使審判官像戇仔。
18佢廢掉君王个權柄，
又使佢等成做犯人。
19佢搶走祭司个職務；
佢推翻揢大權个人。
20佢使信用个人無話講；
佢搶走老人家个智慧。
21佢使尊貴个人見笑，
使有權勢个人衰敗。
22佢使奧妙對烏暗中顯明出來；
佢使烏暗顯出光明。
23佢使列國強大、興旺，
然後又打擊它兜，消滅它兜。
24佢使人民个領袖愚戇，
俾佢等迷失在混亂中；
25佢等像食酒醉个人，
在烏暗中偏來偏去。
Who We AreWhat We EelieveWhat We Do
2025 by iamachristian.org,Inc All rights reserved.
