利未記 15 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

有關男人遺漏症个條例

1上主吩咐摩西㧯亞倫

2向以色列人宣佈以下个條例。男人發遺漏症，所漏出个係無淨浰个。

3佢發遺漏症，無論係漏出來个抑係塞到个，全部使佢無淨浰。

4佢睡過个眠床抑係坐過个東西全部係無淨浰个。

5-6憑到佢个眠床抑係坐佢坐過个東西个人一定愛洗淨衫褲、洗身，總係佢還係無淨浰到該日臨暗仔。

7麼人憑到發遺漏症个人，麼人就一定愛洗淨衫褲、洗身，總係佢還係無淨浰到該日臨暗仔。

8淨浰个人若係被發遺漏症个人呸到口潾，這人一定愛洗淨衫褲、洗身，總係佢還係無淨浰到該日臨暗仔。

9發遺漏症个人騎過个馬鞍抑係坐過个位仔全部係無淨浰个。

10麼人憑到佢坐過个東西，麼人就無淨浰到該日臨暗仔。麼人將這兜東西拿起來，這人一定愛洗淨衫褲、洗身，總係佢還係無淨浰到該日臨暗仔。

11發遺漏症个人無洗手以前摸到麼人，麼人就一定愛洗淨衫褲、洗身，總係佢還係無淨浰到該日臨暗仔。

12發遺漏症个人摸過个缶仔一定愛㧹爛，樹仔做个一定愛用水洗淨。

13發遺漏症个人病症好掉以後，佢一定愛等七日，然後愛洗淨衫褲，用流動个水洗身，恁樣佢正算淨浰。

14第八日，佢愛帶兩隻月鴿仔抑係兩隻班鳩到上主个聖帳篷門口，交給祭司。

15祭司愛將其中一隻做贖罪祭來獻，將另外一隻做燒化祭來獻。祭司愛用這種方法在上主面前為這個人行潔淨禮 。

16人若有漏精，佢一定愛洗全身，總係佢還係無淨浰到該日臨暗仔。

17被精水膏到衫褲抑係皮做个東西，一定愛洗淨，總係這兜東西還係無淨浰到該日臨暗仔。

18男女交合以後一定愛洗身，總係佢等還係無淨浰到該日臨暗仔。

有關女人月經个條例

19女人在月經期間，七日無淨浰。憑到姖个人也無淨浰到該日臨暗仔。

20姖在經期內睡過抑係坐過个東西全部無淨浰。

21-23憑到姖个眠床抑係坐姖坐過个東西个人一定愛洗淨衫褲、洗身，總係佢還係無淨浰到該日臨暗仔。

24男人若㧯經期內个女人交合，佢就遰到該女人个無淨浰，愛無淨浰七日；佢睡个眠床也係無淨浰个。

25女人在經期以外流血多日，抑係經期無順繼續緊流血，在流血期間㧯在經期內共樣，姖係無淨浰个。

26在這流血期間㧯在經期內共樣，姖睡過个眠床抑係坐過个東西，全部係無淨浰个。

27憑到這兜東西个人就無淨浰；佢一定愛洗淨衫褲、洗身，總係佢還係無淨浰到該日臨暗仔。

28女人个經血停止以後，一定愛等七日正算淨浰。

29第八日，姖愛帶兩隻月鴿仔抑係兩隻班鳩到聖帳篷門口，交給祭司。

30祭司愛將其中一隻做贖罪祭來獻，將另外一隻做燒化祭來獻。祭司愛用這種方法在上主面前為姖行潔淨禮。

31上主吩咐摩西愛用這種方法使以色列人莫犯無淨浰个條例，免得佢等打垃圾營中个聖帳篷。佢等打垃圾上主个聖帳篷一定會死。

32以上个條例係有關男人發遺漏症抑係有漏精，恁樣來算無淨浰，

33並女人在經期內流血，就係有關男人抑係女人發遺漏症，以及男人㧯無淨浰个女人交合等各種條例。