出埃及記 24 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

立約个記號

1上主對摩西講：「你㧯亞倫、拿答、亞比戶，連同七十個以色列个長老愛上山到𠊎這位來；愛在離𠊎遠遠个地方跪拜。

2只有你一儕可以到𠊎面前，其他个人做毋得偎近；人民全部做毋得跈你上山。」

3 摩西下山，對人民傳講上主所有个命令㧯例規。全體人民同聲應講：「上主所吩咐个話，𠊎等一定遵守。」

4摩西將上主个命令全部寫下來。第二日打早，佢在山腳下起一座祭壇，並頓十二支石柱；每一支石柱代表以色列十二支族个一族。

5然後佢派以色列人中有兜後生人向上主獻燒化祭，又用牛牯獻平安祭。

6摩西將頭牲个血一半裝在盆肚，另外一半洒在祭壇頂，

7然後向人民大聲讀約書底背記載上主个命令。人民全部講：「上主所吩咐一切个命令，𠊎等願意順從遵守。」

8 摩西就拿盆肚个血拂在人民身項，講：「這係立約个血，係上主照佢一切个誡命㧯你等立約个記號。」

9 摩西、亞倫、拿答、亞比戶，連同七十個以色列个長老共下上山；

10佢等看到以色列个上帝。在佢腳下，有像藍寶石鋪个道路，就像天空个藍色。

11上帝並無伸手傷害這兜以色列个領袖。佢等看到上帝，還在該位共下食、共下啉。

摩西在西奈山頂

12上主對摩西講：「你上山到𠊎這位來。你在這位个時，𠊎愛交給你兩垤石版，石版頂有𠊎所寫愛教導𠊎子民个法律㧯誡命。」

13摩西㧯佢个助手約書亞準備好勢，摩西就開始上上帝个山。

14摩西對以色列个長老講：「你等在營地等，直到𠊎等轉來。有亞倫、戶珥㧯你等共下；若係有麼介紛爭，做得到佢等面前來解決。」

15 摩西上到西奈山，有雲將山遮等。

16-17上主个榮耀降在山頂。以色列人民親眼看到這榮耀个光彩，就像一團烈火在山頂燒等。雲遮蓋山有六日久，第七日上主對雲肚喊摩西。

18摩西進入雲肚，上山去；佢在該位停留四十日夜。