詩篇 88 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

求幫助个祈禱 可拉後代个詩歌，就係以斯拉人希幔个教訓詩，交給聖歌隊長，用悲哀琴調。

1上主 — 拯救𠊎个上帝啊，

𠊎日夜在你面前求喊。

2求你聽𠊎个祈禱；

側耳聽𠊎个求喊！

3恁多災難落在𠊎个身上；

𠊎个性命已經接近陰間。

4𠊎同所有臨終个人共樣，

全部个元氣已經消淨淨 。

5𠊎被人㧒在死人个當中，

像被人㓾死个睡在墳墓，

無可能再得到你个紀念，

無可能再得到你个扶持。

6你將𠊎㧒在深坑肚，

盡深又盡暗个所在。

7你个怒氣恁重磧等𠊎；

你用一切个波浪打𠊎。

8你使𠊎个朋友離開𠊎，

使𠊎成做佢等所惱个。

𠊎被人關等，無辦法脫身；

9𠊎个目珠因為傷心矇掉。

上主啊，𠊎逐日求喊你；

𠊎對你擎手，迫切祈禱。

10你愛行奇事給死人看係麼？

死佬敢會䟘起來頌讚你嗎？

11麼人會在墳墓肚講起你个慈愛？

麼人會在陰間宣揚你个信實？

12在該位暗摸摸，樣看得到你行个奇事？

在該位萬事休，樣還會想念你个公義？

13上主啊，係𠊎懇求你來幫助；

逐日天一光，𠊎就對你祈禱。

14上主啊，你做麼介棄絕𠊎？

你做麼介揞等面毋搭𠊎？

15𠊎從細就受盡多苦，險險無命；

你對𠊎个責罰，使𠊎身心絕望。

16你个大發譴淹過𠊎个身體；

你用得人驚个打擊毀滅𠊎。

17苦難像大水歸日將𠊎圍等；

患難做一下對四面圍困𠊎。

18你使𠊎个朋友鄰舍離開𠊎；

烏暗就成做𠊎惟一个同伴 。