1在希西家王忠心事奉上主个這兜事件以後，亞述皇帝西拿基立侵犯猶大。佢包圍防衛城，想愛佔領這兜城。
2希西家看到西拿基立想愛攻打耶路撒冷，
3-4佢㧯民間該兜領袖㧯官員決定切斷城外个水源，使亞述人在接近耶路撒冷个時無水好啉。佢等就集合盡多人出去塞所有城外个水源。
5希西家王整城牆，加強城內个防備，在城牆頂起城樓，又造外牆。另外，佢又整舊大衛城東片地基較低个城堡 ，也打造盡多刀槍㧯盾牌。
6希西家王命令城肚所有个男人全部接受軍官个指揮，並召集佢等到城門堘个廣場，勉勵佢等講：
7「你等愛堅強，愛勇敢！毋使驚亞述皇帝㧯佢所帶領个大軍隊，因為該㧯𠊎等共下个，比㧯佢共下个更有能力。
8佢只有人个力量；總係𠊎等有上主 — 𠊎等个上帝幫助，為𠊎等相㓾。」人民因為猶大王希西家這兜話就得到鼓勵。
9過後，當亞述皇帝西拿基立㧯佢个軍隊攻打拉吉个時，佢派幾個官員去耶路撒冷，對猶大王希西家㧯該位个猶大人民講：
10「𠊎 — 亞述皇帝西拿基立問你等，你等憑麼介恁有把扼，當耶路撒冷受包圍个時還留在該位？
11希西家㧯你等講，上主 — 你等个上帝會救你等離開𠊎个手。希西家係欺騙你等，會害你等餓死，渴死。
12希西家敢毋係廢掉上主山頂个廟㧯祭壇，吩咐猶大㧯耶路撒冷人民單單做得在一個祭壇敬拜燒香嗎？
13「敢講你等毋知，𠊎个祖先㧯𠊎樣般對付別个國家係麼？有㖠隻國个神有辦法救人民脫離亞述皇帝个手呢？
14𠊎个祖先所滅掉个國家，有㖠隻國个神對𠊎个手中救過佢等个國家？恁樣，你等憑麼介恅到你等个上帝能救你等脫離𠊎个手呢？
15你等毋好被希西家迷惑，毋好被佢騙到。毋好相信佢！吂識有一個國家个神救過佢个人民脫離亞述皇帝个手！你等个神過較無辦法救你等脫離𠊎个手！」
16 亞述皇帝該兜官員還用盡多難聽个話侮辱主上帝㧯佢个僕人希西家。
17皇帝又寫信侮辱上主 — 以色列个上帝，講：「別國个神毋識救過佢等个人民脫離𠊎个手，希西家个神也無辦法救佢个人民脫離𠊎个手。」
18該兜官員用希伯來話向城牆頂个耶路撒冷人民大聲喊，愛嚇佢等、使佢等著驚失志，恁樣較容易佔領這城。
19佢等講到耶路撒冷个上帝，就像講其他民族人手所造个神明共樣。
20所以，希西家王㧯亞摩斯个孻仔先知以賽亞向天頂个上帝祈禱求幫助。
21上主就派一個天使入去亞述皇帝个營中，將軍隊个勇士、官長㧯將軍全部消滅；因為恁樣，亞述皇帝轉佢个國去，見笑到頭那擎毋起來。有一日，佢入去厥神个廟肚，厥幾個親生孻仔將佢㓾掉。
22恁樣，上主救希西家王㧯耶路撒冷人民脫離亞述皇帝西拿基立个手，也脫離其他个仇敵，俾佢等㧯所有个鄰國和平相處。
23盡多人到耶路撒冷，向上主獻祭，也送寶物給猶大王希西家。對該時開始，所有个國家全部尊敬希西家。
希西家个病㧯驕傲(列王紀下 20:1-3，12-19；以賽亞書 38:1-3；39:1-8)24該樣時，希西家發病仔當嚴重，差毋多會死。佢祈禱上主，上主就給佢一個兆頭，指示佢會康復。
25總係希西家驕傲，無感謝上主為佢所做个，所以災禍臨到佢、猶大㧯耶路撒冷。
26後來，希西家㧯耶路撒冷个人民謙卑下來，上主就無在希西家還生个時刑罰佢等。
希西家个財富㧯尊榮27 希西家有盡多財富，人人全部尊敬佢。佢起倉庫，囥佢个金仔、銀仔、寶石、香料、盾牌㧯其他值錢个東西。
28另外，佢又起倉庫囤五榖、酒、橄欖油，又為牛群、羊群起牛欄、羊寮。
29這一切以外，上帝賜給佢个牛、羊、㧯其他个財富盡多，因為恁樣，佢就起加盡多新城。
30希西家將基訓泉水个出口堵起來，俾水流到大衛城个西片。佢所做个逐件事全部順利成功；
31甚至 巴比倫个使者來問這所在發生个奇事，上帝俾希西家自由處理，來考驗佢个內心。
希西家統治个結束(列王紀下 20:20-21)32 希西家其他个事㧯佢對上主个忠誠，全部記在《亞摩斯个孻仔先知以賽亞个異象書》並《猶大㧯以色列列王史》底背。
33希西家死後，葬在大衛後代王室墳墓最高个所在。佢死个時，所有猶大㧯耶路撒冷个人為佢哀傷致敬。佢个孻仔瑪拿西承接佢做王。
Who We AreWhat We EelieveWhat We Do
2025 by iamachristian.org,Inc All rights reserved.
