何西阿書 12 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1「以色列人所做所行全部係捕風捉影；佢等當中，詭詐、暴行一直增加。佢等㧯亞述立條約，又將油送給埃及。」

2上主愛控告猶大人。佢也愛照以色列人所做个報應佢等，責罰佢等。

3𠊎等个祖先雅各還在母胎个時，就捉等厥哥个腳㬹，成人後又㧯上帝相爭。

4佢㧯天使揇腰跤仔揇贏，又噭等懇求天使祝福佢。上帝在伯特利堵到𠊎等个祖先雅各，就通過佢向𠊎等講話。

5這就係上主 — 萬軍个元帥上帝；上主係佢个名。

6所以，雅各个後代啊，你等愛信靠上帝，歸向佢；愛實行不變个愛，伸張正義，一直仰望你等个上帝。

7上主講：「以色列人像迦南个生理人共樣無誠實；佢等愛用無公當个秤仔騙人。

8佢等講：『𠊎等有錢了；𠊎等發財了！無人尋得到𠊎等得橫財个罪。』

9𠊎係上主，係𢱋你等出埃及个上帝。𠊎愛使你等再住帳篷，像在指定過節个時共樣。

10「𠊎向先知講話，使佢等看到盡多異象，又通過佢等講比喻，來警告𠊎个子民。

11總係基列還係充滿罪惡；該兜拜偶像个人到尾也係虛空。佢等在吉甲獻牛牯做祭物；佢等个祭壇會變做像石堆放在田溝。」

12頭擺雅各逃難到美索不達米亞；為到討𡜵娘，在該位㧯人掌羊。

13上主派一位先知 去埃及，將以色列人救出來，通過佢照顧佢等。

14總係以色列人惹上主大發譴；佢等个血債愛歸到佢等身項。佢等藐視主，所以佢愛重重刑罰佢等。