歷代志上 17 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

拿單傳消息給大衛(撒母耳記下 7:1-17)

1 大衛王住在王宮。有一日，佢對先知拿單講：「你看，𠊎住在香柏樹起个王宮，總係上主个約櫃還在帳篷肚！」

2 拿單對大衛講：「你就照你个心意去做，因為上帝㧯你共下。」

3總係，該暗晡上帝對拿單講：

4「去㧯𠊎个僕人大衛講，上主恁樣講：『你做毋得起聖殿給𠊎住。

5自從𠊎對埃及帶以色列人出來到這下，𠊎無住過聖殿；𠊎一直住在帳篷，逐所在徙來徙去。

6𠊎㧯以色列人共下流浪該兜年日，該兜𠊎選來看顧𠊎子民所有个領袖，𠊎從來毋識問過麼人，做麼介毋為𠊎起一座香柏樹个聖殿。』

7「所以，你愛㧯𠊎个僕人大衛講，𠊎 — 上主、萬軍个元帥恁樣講：『你在野地掌羊，𠊎將你呼召出來，立你做𠊎子民以色列个王。

8你無論到麼介地方，𠊎攏總㧯你共下；𠊎除掉你所有个仇敵。𠊎愛使你㧯世界最偉大个人共樣恁有名。

9-10𠊎為𠊎个子民以色列選一個地方，將佢等安頓在該位，使佢等毋會再被人欺負。自從佢等徙到這垤土地，𠊎又設立士師來治理佢等，佢等卻常常被惡霸欺壓；總係這種事毋會再發生了。𠊎答應打贏你所有个仇敵。𠊎 — 上主也對你宣告，𠊎愛賜給你有後代。

11你死後㧯祖先葬共下个時，𠊎會立你一個孻仔做王，使佢个國強盛。

12佢正係為𠊎起聖殿个人；𠊎愛堅固佢个王位直到永遠。

13𠊎愛做佢个阿爸；佢愛做𠊎个孻仔。𠊎毋會收轉𠊎對佢个痛惜，像𠊎以前收轉對掃羅个痛惜恁樣；𠊎識廢掉佢，立你做王。

14𠊎愛使佢永遠治理𠊎个子民㧯𠊎个國；佢个王位會永遠存在。』」

15 拿單將上帝向佢啟示个逐件事全部㧯大衛講。

大衛感恩个祈禱(撒母耳記下 7:18-29)

16 大衛王入去聖帳篷，到上主面前，坐等祈禱講：「主上帝啊，你為𠊎所做个一切，𠊎實在堪毋得，𠊎个家族也堪毋得。

17總係，上帝啊，你賜給𠊎恁多，甚至應許在將來个日仔愛恩待你僕人个子孫。主上帝啊，你已經看𠊎做大人物來款待。

18𠊎還有麼介話好講呢？因為你知你个僕人，還係賜給𠊎榮耀㧯尊貴。

19上主啊，你恁樣款待𠊎，又將僕人將來个興旺向𠊎顯明，這全部係照你个心意。

20上主啊，㖠有㧯你比抑得个！𠊎等知，除了你以外，無別個上帝。

21世間乜無一個國家像以色列；你救以色列人民離開埃及，使佢等做你自家个子民。你為佢等做偉大奇妙个事，使你个大名傳到全世界。你个子民向前行个時，你將其他个民族逐走。

22你使以色列永遠做你自家个子民，你 — 上主也做佢等个上帝。

23「上主啊，求你實現你有關𠊎㧯𠊎後代个應許；求你永遠照你所講个話實行。

24願你个應許永遠無變。願你个名永遠受尊敬；願人民永遠稱頌：『上主 — 萬軍个元帥係以色列个上帝，係治理以色列个上帝！』恁樣，你會 世世代代保守你僕人大衛个王朝。

25上帝啊，𠊎大膽在你面前恁樣祈禱；因為你將這一切向𠊎 — 你个僕人啟示出來，㧯𠊎講，你愛立𠊎个後代做王。

26上主啊，只有你係上帝；你對你个僕人也有恁奇妙个應許。

27這下求你賜福給僕人个後代，使佢等繼續享受你个恩惠。上主啊，你已經賜福給佢等；願你永遠恩待佢等 。」