耶利米書 35 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

耶利米㧯利甲族

1 約西亞个孻仔約雅敬做猶大王个時，上主對耶利米講：

2「你去利甲族人該位，請佢等過來，並帶佢等到聖殿个一隻房間肚，給佢等酒啉。」

3所以𠊎將利甲全族个人 — 哈巴洗尼雅个孫仔，雅利米雅个孻仔雅撒尼亞㧯佢所有个兄弟㧯孻仔，

4全部帶入上主个聖殿。𠊎𢱋佢等到伊基大利个孻仔神人哈難該兜孻仔个房間肚去。該隻房間係在沙龍个孻仔 — 掌門个瑪西雅个房間頂高，在其他官員房間个旁邊。

5然後𠊎將酒杯㧯裝滿酒个酒壺放在利甲族人面前，對佢等講：「請啉酒！」

6總係佢等講：「𠊎等毋啉酒。𠊎等个祖先利甲个孻仔約拿達命令𠊎等㧯𠊎等个後代永遠做毋得啉酒，

7做毋得起屋，做毋得委種，也做毋得種葡萄。佢命令𠊎等一生人住帳篷，使𠊎等在這暫住个所在住到年長月久。

8𠊎等遵守祖先利甲个孻仔約拿達給𠊎等所有个指示，一生人毋識啉過酒；𠊎等个𡜵娘子女也無啉過酒。

9𠊎等無起屋來住，無葡萄園㧯田地，也無委種。

10𠊎等服從祖先約拿達个命令，遵守佢所有个指示，一直住帳篷。

11總係，巴比倫王尼布甲尼撒攻打這地方个時，𠊎等決定到耶路撒冷去，好閃開巴比倫㧯敘利亞个軍隊。恁樣，𠊎等正會住在耶路撒冷。」

12-13接等，上主 — 萬軍个元帥、以色列个上帝喊耶利米去㧯猶大並耶路撒冷人民講：「𠊎 — 上主問你等，你等做麼介毋受管教，毋服從𠊎个話呢？

14-15利甲个孻仔約拿達个子孫一直遵守約拿達个命令，到今晡日無人啉過酒。總係𠊎早就派𠊎个僕人 — 該兜先知一擺又一擺㧯你等講，勸你等離開罪惡个生活，做正直个事。佢等警告你等做毋得敬拜服事別个神明，好使你等繼續住在𠊎賜給你等㧯你等祖先个土地。總係你等毋搭𠊎，一直毋聽從𠊎。

16利甲个孻仔約拿達个子孫遵守佢等祖先个命令，總係你這兜人民毋聽從𠊎。

17所以，𠊎 — 上主、萬軍个元帥、以色列个上帝愛照𠊎所講个，降大災難在猶大㧯耶路撒冷个人民身上。因為𠊎對你等講話，總係你等毋聽；𠊎喊你等，總係你等毋搭𠊎。」

18後來，耶利米㧯利甲族人講：「上主 — 萬軍个元帥、以色列个上帝恁樣講：你等聽從祖先約拿達个命令，遵守佢所有个指示，實行佢一切个話。

19所以，𠊎 — 上主、萬軍个元帥、以色列个上帝恁樣應許：利甲个孻仔約拿達个家族永遠會有人事奉𠊎。」