1上主㧯摩西講，
2以色列人到上主賜給佢等个土地以後，愛遵守以下个條例。
3燒獻給上主做燒化祭、還願祭、甘心祭，抑係宗教節期應該獻个祭，做得用牛牯、羊牯、綿羊、山羊做祭物；這兜祭物个香味係上主所歡喜个。
4-5獻綿羊抑係山羊做燒化祭給上主个，在獻每一隻頭牲个時，愛同時帶一公斤幼麵粉攪一公升橄欖油个素祭，還愛㧯一公升个酒共下獻。
6獻綿羊牯个時，愛同時獻兩公斤幼麵粉攪一公升半橄欖油个素祭，
7還愛㧯一公升半个酒共下獻。這兜祭物个香味係上主所歡喜个。
8獻牛牯給上主做燒化祭、還願祭，抑係平安祭个時，
9愛同時獻三公斤幼麵粉攪兩公升橄欖油个素祭，
10還愛㧯兩公升个酒共下獻。這火祭个香味係上主所歡喜个。
11獻一隻牛牯、羊牯、綿羊抑係山羊个時，全部愛恁樣辦理。
12若獻一隻以上，連帶愛獻个祭物應該照頭牲个數目增加。
13每一個本地𫱔个以色列人在獻上主所歡喜个清香火祭个時，全部應該恁樣辦理。
14無論㖠時，住在你等當中个外族人，不管係暫時抑係永久定居，在獻上主所歡喜个清香火祭个時，也愛照這個條例恁樣來辦理。
15這條共用个條例愛做你等㧯你等當中个外族人世世代代遵守个規則。你等㧯佢等在上主看來係共樣个。
16所以，共樣个條例㧯規則用在你等身上，也用在佢等身上。
17上主㧯摩西講，
18以色列人到上主𢱋佢等入去个土地以後，愛遵守以下个條例。
19佢等享受該地所出產个糧食時，一定愛拿出一部份做特別个禮物獻給上主。
20你等焙餅个時，愛用最先收成个麥仔所焙个第一垤餅做特別个禮物獻給上主，就像拿正打好个麥仔獻做特別个奉獻恁樣。
21你等世世代代愛對所焙个這種餅中，將第一垤拿出來做特別个禮物獻給上主。
無意中犯罪愛獻祭个條例22若係你等無意中違背上主吩咐摩西个條例 —
23就係對該日直到世世代代个會眾無完全遵行上主通過摩西所頒佈个命令 —
24會眾並毋知恁樣做係毋著，全會眾就一定愛獻一隻牛牯做燒化祭、做上主所歡喜清香个火祭，同時愛獻應該獻个素祭㧯祭酒。另外，佢等還愛獻一隻山羊牯做贖罪祭。
25祭司愛為以色列全會眾贖罪，使佢等得到赦免；因為佢等做毋著毋係故意个，佢等也因為自家个毋著將火祭㧯贖罪祭獻給上主。
26恁樣，以色列全會眾㧯住在佢等當中个外族人全部會得到赦免，因為佢等做毋著毋係故意个。
27若係有一個人無意中犯罪，就一定愛獻一隻一歲大个山羊乸做贖罪祭。
28祭司愛在上主面前為佢行潔淨禮，除掉佢个罪，使佢得到赦免。
29無論係本地𫱔个以色列人抑係住在佢等當中个外族人，無意中犯罪，全部一定愛守共樣个條例。
30總係該故意犯罪个，不管係本地𫱔个以色列人抑係外族人，全部係犯了侮辱上主个罪，一定愛處死刑。
31因為佢藐視上主个話，故意違背上主个命令，該人總愛處死刑；佢个罪孽愛歸到佢个身上。
犯安息日个人32 以色列人還在曠野个時，有一儕在安息日出去拈柴，被人發現。
33該兜發現佢拈柴个人，就將佢帶到摩西、亞倫㧯全會眾該位，
34將佢關起來，因為當時毋知愛樣般刑罰佢。
35後來上主對摩西講：「這個人一定愛處死刑；全會眾愛在營外用石頭㧹死佢。」
36所以全會眾將佢帶到營外，照上主命令摩西个，用石頭㧹死佢。
攣繸仔个條例37上主命令摩西，
38愛吩咐以色列人講：「你等愛在衫个邊堘四角攣繸仔，在逐條繸仔頂愛有一條藍色个細帶仔。你等世世代代愛恁樣做。
39這繸仔係愛提醒你等，逐擺看到它就會想到𠊎所有个誡命，並去遵行。恁樣，你等正毋會照自家个心意㧯眼目个慾望亂來。
40這繸仔會提醒你等遵守𠊎所有个誡命。你等愛分別為聖歸屬𠊎。
41𠊎係上主 — 你等个上帝；𠊎識𢱋你等出埃及，愛做你等个上帝。𠊎係上主 — 你等个上帝。」
Who We AreWhat We EelieveWhat We Do
2025 by iamachristian.org,Inc All rights reserved.
