1 便雅憫人啊，遽遽離開耶路撒冷逃命噢！你等愛在提哥亞歕羊角警告，在伯‧哈基琳點𤏸烽火！因為會有大災難㧯大毀滅對北方來了。
2鍚安城雖然像細妹仔盡靚又溫柔，𠊎定著愛毀滅姖！
3列國个君王會帶領佢等个軍隊，在城个周圍佔地安營，親像牧人帶領佢等个羊群到該位來搶草食。
4佢等會命令：「準備攻打！在當晝頭發動攻城！」後來佢等又講：「慘了，日頭个影仔拖當長了，日頭會落山了。
5總係暗晡頭𠊎等乜愛攻城，毀壞姖个城堡。」
6上主 — 萬軍个元帥命令列國个君王斬樹仔、起土堆來圍攻耶路撒冷。佢講：「這隻城充滿暴力，𠊎愛責罰姖。
7就像井一直湧出泉水，這隻城也一直增加罪惡。𠊎聽到城肚發出暴力毀滅个聲；𠊎也隨時看到病痛㧯傷害。
8耶路撒冷人啊，你等愛對這兜苦難得到教訓。若無，𠊎愛㧒掉你等，使你等个城荒廢，無人住。」
悖逆个以色列9上主 — 萬軍个元帥恁樣講：「敵人會來捉賸到个以色列人走，就像摘葡萄个人摘了又摘，將所有个葡萄摘淨淨。所以，你愛把扼機會，盡量搶救賸到个人！」
10𠊎應講：「𠊎向佢等傳你講个話，警告佢等，有麼人願意接受呢？佢等塞等 耳公，毋肯接受你个話。佢等無歡喜你吩咐𠊎講个話，認為𠊎係侮辱佢等。
11上主啊，你个大發譴也充滿在𠊎身上，𠊎忍毋住了！」
所以上主㧯𠊎講：「將𠊎个大發譴倒在街頭巷尾个細人仔㧯成群結黨个後生人身上。公婆會共下被人捉走，連壽年當高个老人家也係共樣。
12佢等个屋仔連同佢等个田地、𡜵娘全部會歸別人 。𠊎愛伸手責罰這地方个人民；
13因為佢等無論地位高低全部貪不義个錢財，連先知㧯祭司也詐欺人民。
14𠊎子民个著傷，佢等也無認真醫治。佢等講：『平安！平安！』其實無平安。
15佢等做這恁得人惱个事應該知見笑，總係佢等毋知見笑也毋會面紅。所以，佢等會㧯別人共樣跌倒。𠊎責罰佢等个時，佢等就會橫到貼貼。𠊎 — 上主恁樣宣佈了。」
以色列拒絕上帝个道路16上主對佢个子民恁樣講：「你等愛企在十字路口去看。在該兜舊路中，看㖠條係最好个路。行該條路，你等就會有平安。」
總係佢等應講：「無愛！𠊎等無愛行該條路！」
17上主還派守望者給佢等，喊佢等愛注意聽警報个羊角，總係佢等講：「𠊎等無愛聽！」
18所以，上主講：「列國啊，你等愛聽！眾人啊，愛知佢等會堵到麼介事！
19大地啊，愛聽！𠊎愛降災禍給𠊎个子民，就係佢等詭計多端所結个果子；因為佢等拒絕𠊎个教訓，毋聽從𠊎个話。
20佢等獻給𠊎示巴个乳香，帶給𠊎遠方个菖蒲。𠊎無合意！𠊎毋接受佢等个燒化祭，也無歡喜佢等个祭物。
21所以，𠊎 — 上主恁樣宣佈：𠊎愛將絆腳石放在這兜人面前，俾佢等絆倒。父子，連鄰舍、親友也全部愛滅亡。」
北方來个仇敵22上主恁樣講：「看啊，有一個民族對北方來；在遠方有一隻強國準備來相㓾。
23佢等用箭用刀裝備自家；佢等當殘忍、無憐憫个心。佢等騎馬个聲像海浪吼吼滾。佢等準備好愛來攻擊鍚安城。」
24 耶路撒冷人講：「𠊎等聽到戰爭个風聲，手腳就軟掉。𠊎等非常痛苦，像產婦个陣痛。
25𠊎等毋敢到野外，也毋敢上街路；因為逐所在有擎刀帶劍个敵人，四周圍都恁得人驚。
26同胞啊，愛著麻衫，在火灰肚輾來輾去。愛當悲哀，像喪失單丁子恁樣來艱苦到大噭，因為該毀滅者會忽然間來攻擊𠊎等。」
27上主對耶利米講：「𠊎愛使你做𠊎子民个煉金師傅，使你知樣般試驗佢等个行為。
28佢等全部係硬頸个叛徒，像銅鐵恁硬。佢等逐所在去搬弄是非，所做个非常敗壞。
29風箱盡吹，爐火當猛，鉛鐵也會鎔化。總係𠊎个子民受到恁多試煉還係枉然，作惡个人還係吂除掉。
30人會將佢等看做㧒掉个銀渣，因為𠊎 — 上主已經將佢等豁掉。」
Who We AreWhat We EelieveWhat We Do
2025 by iamachristian.org,Inc All rights reserved.
