1上主恁樣講：「到該時，𠊎愛做以色列逐族个上帝；佢等愛做𠊎个子民。
2在曠野，𠊎憐憫該兜無被刀劍㓾死个人。在以色列人盡想安息个時，
3𠊎對遠遠个地方 向佢等 顯現。以色列人啊，𠊎永遠痛惜你等，𠊎還愛用不變个慈愛痛惜你等。
4𠊎愛重新建立你等。你等會再拿起鈴鼓，大聲唱歌跳舞。
5你等會在撒馬利亞个山頂重新種葡萄；種个人會享受到園肚个出產。
6有一日，守望个人會在以法蓮山頂大聲喊：『來噢！𠊎等到錫安去朝見上主 — 𠊎等个上帝。』」
7上主恁樣講：
你等愛為以色列大聲唱歌，
為最偉大个國家大聲盡喊，
你等愛唱頌讚个歌講：
「上主啊，求你拯救你个子民，
就係以色列賸到个人民。」
8看啊，𠊎愛對北方將佢等帶轉來，
對天涯海角將佢等聚集起來。
瞙目个、跛腳个、有身項个、𫱔細人仔个，
也全部會弛崗打陣共下轉來。
9看啊，𠊎个子民會一路噭等轉來；
佢等會跈等𠊎行，透路祈禱。
𠊎愛帶佢等經過溪水邊，
𢱋佢等行平平个直路，
使佢等毋會跌倒。
𠊎係以色列个阿爸；
以法蓮係𠊎个長子。
10上主講：
萬國啊，你等愛注意聽𠊎个話，
你等愛在遠遠个海島傳𠊎个話。
𠊎逐散以色列 — 𠊎个子民，
總係𠊎愛再聚集佢等；
𠊎愛保護佢等，像牧人保護羊群。
11𠊎愛救贖雅各个後代，
對強國手中將佢等救出來。
12佢等會轉來，在錫安山頂歡喜唱歌；
佢等會滿面歡喜，享受𠊎豐富个恩惠：
就係五榖、新酒、橄欖油、牛羊。
佢等會像水源充足个田園；
毋會再愁麼介、欠麼介。
13該時，細妹仔會歡喜跳舞；
老人家㧯後生人會共下快樂。
𠊎愛使佢等个悲傷變做歡喜，
𠊎愛安慰佢等，使佢等个憂愁變做快樂。
14𠊎愛使該兜祭司有豐足个食物，心滿意足；
𠊎愛使𠊎个子民全無欠缺。
𠊎 — 上主恁樣宣佈了。
上主憐憫以色列15上主恁樣講：
在拉瑪有聽到噦天噦地个噭聲；
係蕾潔為姖个子女大噭，毋肯接受安慰，
因為佢等全部無掉去了。
16上主恁樣講：
毋好噭了！拭燥目汁！
你个辛苦會得到報賞；
佢等會對敵人个國家轉來。
17你个前途充滿希望；
你个子女會轉來故鄉。
𠊎 — 上主恁樣宣佈了。
18𠊎聽到以法蓮
悲傷講：上主啊，𠊎等就像吂教乖个細牛牯，
總係你訓練𠊎等，使𠊎等順服。
求你帶𠊎等轉來，𠊎等愛歸向你，
因為你係上主 — 𠊎等个上帝。
19雖然𠊎等悖逆離開你，
𠊎等即時就想愛回頭。
你个管教使𠊎等後悔，悲傷到捶心肝；
𠊎等因為後生時个罪感覺盡見笑、受到侮辱。
20上主講：
以法蓮啊，你係𠊎最惜个孻仔，
係𠊎个心肝寶貝。
𠊎逐擺責備你，
還係盡顧念你 。
𠊎惜你惜入骨；
𠊎一定會憐憫你。
21你愛插好指路標，頓好路牌；
你愛尋你行過个該條大路。
𠊎所惜个以色列人啊，好轉來了！
轉到你等个故鄉！
22悖逆个人啊，你捩去捩轉愛到幾時呢？
𠊎在地上行一項新个事：
婦女愛保護男人。
上帝子民个光明前途23上主 — 萬軍个元帥、以色列个上帝恁樣講：「𠊎俾捉來个子民轉到故鄉个時，佢等會在猶大國內逐隻城市再講：
『公義个住所，錫安聖山啊，
願上主賜福給你。』
24 猶大个土地㧯國內逐隻城市將來會有盡多个農民、㧯帶等羊群个牧羊人共下住在該位。
25𠊎愛使痶个人精神恢復，使憂悶个人心滿意足。
26因為恁樣人民會講 ：『𠊎睡醒个時，感覺睡到盡鬆爽。』
27「𠊎 — 上主講，日仔會到，𠊎愛使以色列㧯猶大个人口增加，頭牲興旺。
28𠊎頭擺樣般用心將佢等挷掉、拆掉、推翻、破壞，並降災；𠊎也愛樣般用心栽培佢等、建立佢等。
29該時，人毋會再講：
『爺𡟓食酸葡萄，
卻酸到子女个牙齒。』
30反轉，麼人食酸葡萄，就酸到麼人个牙齒；逐儕愛因為自家个罪來死。」
31上主講：「日仔會到，𠊎愛㧯以色列並猶大个人民立新个約。
32毋像𠊎牽等佢等祖先个手帶領佢等出埃及个時，㧯佢等所立个約。在該契約中，𠊎係佢等个老公，總係佢等違背該約。
33到該日以後，𠊎愛㧯以色列人民立个新約係恁樣：𠊎愛將𠊎个法律放入佢等个心肚，寫在佢等个心上。𠊎愛做佢等个上帝，佢等愛做𠊎个子民。
34佢等毋會再教鄰舍㧯自家个兄弟講：『愛認識上主』，因為對最細个到最大个，佢等攏總會認識𠊎。𠊎愛赦免佢等个罪，毋會再記得佢等个過犯。𠊎 — 上主恁樣宣佈了。」
35上主指定日頭在日時頭發光，
派月光星仔做暗晡頭个光。
佢攪動大海，使海浪吼吼滾。
佢个名係上主 — 萬軍个元帥。
36佢講：若係這兜定律在𠊎面前廢掉，
以色列个後代也就在𠊎面前
永遠毋會成做國家。
37上主又恁樣講：
若係人有辦法量出天有幾高，
測出地个根基有幾深，
𠊎正會因為以色列个後代
一切所行个來豁掉佢等。
38上主講：「看啊，日仔會到，歸座耶路撒冷城，愛為𠊎重新建造，對哈楠業樓到角門。
39城个西片還愛向外量到迦立山，又捩到歌亞。
40歸隻堆等身屍㧯塵灰个山壢，還有汲淪溪到東片馬門轉角一切个荒地，全部愛分別做聖，歸入上主个聖城。這城絕對毋會挷掉，永遠毋會橫掉。」
Who We AreWhat We EelieveWhat We Do
2025 by iamachristian.org,Inc All rights reserved.
