詩篇 64 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

祈求保護 大衛个詩，交給聖歌隊長。

1上帝啊，求你聽𠊎緊噌个聲！

求你救𠊎脫離仇敵个恐嚇！

2求你保護𠊎莫被壞人暗算，

也毋好被陰險个人陷害。

3佢等磨利舌乸，就像磨刀仔，

像射箭恁樣，發出惡毒个話。

4佢等暗中埋伏，愛射無罪个人；

開弓就射，全無顧慮。

5佢等彼此教唆，陰謀做壞事；

佢等計劃將羅網設到盡祕密，

講：「這兜羅網麼人看得到呢？」

6佢等逐擺設好詭計就講：

「這計謀係𠊎等用盡心機設計个！」

人个心思意念實在真難理解！

7總係，上帝愛用箭射佢等；

佢等會在忽然之間著傷。

8佢愛因為佢等个話消滅佢等；

看到佢等个人全部會緊搖頭。

9大家攏總會愊愊掣，

傳講上帝个工作，

也思想佢个作為。

10義人因為上主就歡喜，並倚靠佢；

一切心肝正直个人也愛頌讚佢。