1上主命令摩西㧯亞倫
2向以色列人宣佈以下个條例。地上所有个走獸當中，你等做得食這兜：
3凡腳蹄分做兩瓣，又會倒草个動物，你等全部做得食。
4-6總係你等做毋得食駱駝、獾，抑係兔仔，愛將這兜算做無淨浰个動物；因為牠兜雖然會倒草，總係腳蹄無分瓣。
7豬仔也做毋得食，愛將牠算做無淨浰个動物；因為豬仔雖然腳蹄分瓣，總係無倒草。
8這兜動物个肉你等做毋得食，連摸牠兜个屍體也做毋得；牠兜算做無淨浰个動物。
9凡在水肚、海肚、河壩底背个，你等做得食這兜：有魚翼有鱗个魚類，你等全部做得食；
10總係無魚翼無鱗个魚類，你等做毋得食。
11你等愛將牠兜算做無淨浰个，做毋得食牠兜个肉，連摸牠兜个屍體也做毋得。
12凡在水肚無魚翼、無鱗个魚類，你等愛將牠兜算做無淨浰个。
13-19以下个鳥仔算做無淨浰，你等全部做毋得食：鷹鳥、禿鷹、鷂婆、鳶、獵鷹、烏鴉㧯牠共類个、鴕鳥、梟、海鷗、鷹雀㧯牠共類个、鴟鴞、鸕鶿、貓頭鳥、角鴟、鵜鶘、鵰、鸛鳥、白鶴㧯牠共類个、戴鵀、㧯蝠婆 。
20-21凡係有翼胛个昆蟲，除了會跳个，全部係無淨浰个。
22你等做得食草蜢、土狗仔，抑係大草蜢。
23總係其他有翼胛、會爬个細昆蟲，你等愛將牠兜算做無淨浰个。
24-28以下動物个屍體，麼人摸到、麼人就會無淨浰到臨暗仔：所有腳蹄無分瓣、無倒草，㧯有腳盤个四腳動物。動到牠兜屍體个人，一定愛將衫褲洗淨，總係佢還係無淨浰到臨暗仔。
29-30地上爬个，愛算做無淨浰个，有這兜：錢鼠、老鼠、狗乸蛇㧯牠共類个、壁蛇、大蜥蜴、山狗螮、蛇醫、㧯變色龍。
31地上爬个，這兜全部愛算做無淨浰个。麼人摸牠兜个屍體，麼人就無淨浰到臨暗仔。
32牠兜个屍體跌在麼介東西頂高，無論係樹仔做个、布仔做个、皮仔做个，抑係麻布袋，無論用途係麼介，全部算係無淨浰。愛將這個東西浸在水肚；它算係無淨浰到臨暗仔，以後就淨浰了。
33牠兜个屍體若跌落泥做个鑊頭肚，鑊頭肚个東西就無淨浰；你等愛將鑊頭打爛。
34平常做得食个東西，若搵到該鑊頭个水，就無淨浰；平常做得啉个東西，若裝在該鑊頭肚，也算無淨浰。
35牠兜个屍體無論跌在麼介東西頂高，這東西就無淨浰；無論係風爐抑係灶頭全部愛打爛。
36雖然各種東西一憑到牠兜个屍體就無淨浰，總係泉水㧯陂塘水還係淨浰个。
37這兜動物个屍體若跌在愛種个種子頂高，種子還係淨浰个。
38總係種子若係淋過水，有屍體也跌在頂高，這種子就無淨浰了。
39做得食个動物若係死掉，麼人摸到牠就算係無淨浰到臨暗仔。
40人食到牠个肉，一定愛將衫褲洗淨，總係佢還係無淨浰到臨暗仔。所有搬屍體个，也愛洗淨衫褲，總係佢還係無淨浰到臨暗仔。
41-42地面个細爬蟲，無論係用肚笥爬个、用四隻腳行个，抑係用多腳行个全部算做無淨浰个，你等做毋得食。
43你等做毋得食這兜爬蟲來打垃圾自家變做無淨浰。
44𠊎係上主 — 你等个上帝；你等愛將自家分別為聖，成做聖潔，因為𠊎係聖潔个。你等做毋得因為這兜爬蟲來打垃圾自家。
45𠊎係上主；𠊎𢱋你等出埃及，愛做你等个上帝。你等愛聖潔，因為𠊎係聖潔个。
46以上係有關動物、鳥類、魚類㧯爬蟲類个條例。
47你等一定愛分別淨浰抑係無淨浰个、做得食抑係做毋得食个生物。
Who We AreWhat We EelieveWhat We Do
2025 by iamachristian.org,Inc All rights reserved.
