1「在上主 — 你等个上帝消滅佢愛賜給你等該地个各民族，使你等佔領佢等个土地，俾你等住在佢等个城鎮㧯屋仔以後，
2-3你等就愛將歸垤土地分做三區，在逐區个中心起一座城，愛在交通方便个地方，使因為過失害死人个人做得逃到該位，要求保護。
4若係有人毋堵好害死㧯佢全無冤仇个人，佢做得逃到一個逃閃城去保命。
5舉例來講，有人㧯鄰舍共下到樹林中斬樹仔，當斬个時，佢个斧頭𢫫掉，飛到佢鄰舍个身項，害佢死掉，這個人做得逃到任何一個逃閃城去保命。
6若係只有一個逃閃城，可能因為路途忒遠，該報血仇个親戚逐到佢，在大發火中將佢㓾死。其實，這個人係毋堵好害死㧯佢全無冤仇个鄰舍，係毋應該處死个。
7所以，𠊎命令你等愛起三座逃閃城。
8「上主 — 你等个上帝，照佢向你等祖先所做个應許，若係擴展你等个地界，將佢應許給你等个土地賜給你等，
9你等就愛另外增加三座逃閃城。 (若係你等認真遵行𠊎今晡日向你等頒佈个所有誡命，敬愛上主 — 你等个上帝，常常遵行佢个道，佢就會將這土地賜給你等。)
10你等愛恁樣做，俾無罪个人毋使死；你等也毋使在上主 — 你等个上帝愛賜給你等个土地上承擔無罪个人被人㓾死个血債。
11「若係有人恨佢个鄰舍，埋伏起來，故意殺害佢，然後逃到一個逃閃城去，
12佢本城个長老一定愛派人去將佢強強捉轉來，交給報血仇个親戚來處死佢。
13你等毋使憐憫這種人，愛對以色列中除掉這種謀殺人个罪，使你等就凡事順利。」
舊地界个條例14「你等在上主 — 你等个上帝愛賜給你等个土地上，做毋得徙鄰舍个地界；該係前人所劃定个。」
證人个條例15「單單靠一個證人來定人个罪係毋罅个；至少愛有兩個以上个證人正做得定人个罪。
16若係有一個壞人做假見證，陷害另外一個人，
17這兩個爭論个人就愛到上主所選个所在，求輪班个祭司㧯審判官來決裁。
18審判官一定愛詳細調查案件，若係發現證人做假見證，陷害以色列同胞，
19你等就愛對待佢像佢想愛對待同胞一樣。恁樣，你等就做得除掉這種壞事。
20其他个人聽到正會驚，無人敢再做這種壞事。
21對這種人，你等毋使憐憫，應該用命賠命，目珠賠目珠，牙齒賠牙齒，手賠手，腳賠腳。」
Who We AreWhat We EelieveWhat We Do
2025 by iamachristian.org,Inc All rights reserved.
