1除酵節 (又安到𨃟過節) 會到了。
2祭司長㧯經學教師因為驚民眾，就陰謀愛樣般殺害耶穌。
猶大出賣耶穌(馬太 26:14-16；馬可 14:10-11)3該時，撒但進入加略人猶大个心。 (猶大係耶穌十二個學生个一個。)
4猶大去同祭司長㧯聖殿个警衛長參詳，愛樣般將耶穌交給佢等。
5佢等非常歡喜，又答應拿錢給佢。
6猶大就同意，開始尋機會，愛在無眾人在場个時節出賣耶穌。
準備𨃟過節个晚餐(馬太 26:17-25；馬可 14:12-21；約翰 13:21-30)7除酵節期間，㓾𨃟過節羔羊該日到了。
8耶穌派彼得㧯約翰出去，吩咐佢等講：「你等去代𠊎等準備𨃟過節个晚餐。」
9佢等問講：「你愛𠊎等在㖠位準備？」
10耶穌講：「你等入城去，會堵到一個人帶等一罐水；你等就跈等佢，到佢入去个屋肚，
11問該家个主人講：『先生講：𠊎㧯𠊎个學生食𨃟過節晚餐个客廳在㖠位？』
12佢會帶你等去看樓頂一間佈置好个大房間；你等就在該位準備。」
13佢等就去；所堵到个全部㧯耶穌對佢等講个共樣；佢等就在該位準備𨃟過節个晚餐。
主个晚餐(馬太 26:26-30；馬可 14:22-26；哥林多前書 11:23-25)14食夜个時間到了，耶穌入去，使徒也同佢共下坐桌。
15佢對佢等講：「𠊎一直希望在受難以前同你等共下食這𨃟過節个晚餐。
16𠊎㧯你等講，無等到這晚餐个意義實現在上帝國，𠊎絕對毋會再食這個晚餐。」
17然後，耶穌接過杯仔，感謝上帝後，講：「你等拿去，大家分等啉。
18𠊎㧯你等講，從今以後，無等到上帝个國臨到，𠊎絕對毋會再啉這葡萄酒。」
19接等，佢拿起餅仔，感謝上帝後，就擘開，分給佢等，講：「這係𠊎个身體，係為你等犧牲个；你等愛恁樣行，來紀念𠊎。」
20食飽後，佢照樣拿起杯仔，講：「這杯係上帝个新約，係用𠊎為你等流出个血所設立个。
21「你等看，出賣𠊎个人同𠊎共桌！
22人子確實愛照上帝个安排來受害，總係出賣佢个人有災禍了！」
23佢等就彼此緊問，到底係麼人愛做這件事。
學生爭論麼人最大24學生中間發生爭論，到底麼人最大。
25耶穌對佢等講：「外邦人个君王有權管轄佢等；佢等个統治者又被人稱做救星；
26總係你等毋係恁樣。你等當中最大个，反轉愛像最細个；做領袖个，應該像僕人。
27係坐桌个較大，抑係服事佢个較大呢？敢毋係坐桌个較大嗎？總係，𠊎在你等中間係服事人个。
28「𠊎受磨煉个時，你等一直同𠊎共下。
29吾爸有賜𠊎一個國，這下，𠊎共樣也愛將這國个統治權賜給你等。
30你等愛在𠊎个國底背同𠊎共下啉食，也愛坐在寶座頂高審判以色列个十二支族。」
耶穌預言彼得毋認佢(馬太 26:31-35；馬可 14:27-31；約翰 13:36-38)31耶穌又講：「西門，西門！撒但已經要求試探你等，像耕種人篩麥仔恁樣來篩你等。
32總係，𠊎已經為你祈禱，使你个信心毋會無掉去。你倒轉來歸𠊎以後，就愛堅固你該兜兄弟。」
33 彼得講：「主啊，𠊎甘願跈你去坐監，同你共下死！」
34耶穌講：「彼得，𠊎㧯你講，今晡日雞仔啼以前，你會三擺講你毋識𠊎。」
錢包、旅行袋、刀仔35耶穌又對佢等講：「頭擺，𠊎派你等出去，喊你等毋好帶錢包，毋好帶旅行袋抑係鞋仔，你等識欠麼介麼？」
佢等應講：「毋識。」
36耶穌講：「總係這下，有錢包抑係旅行袋个，愛帶等；無刀仔个，愛賣衫去買一支。
37𠊎㧯你等講，聖經所講：『佢承擔罪人个命運』該句話，一定愛實現在𠊎个身上。事實上，所有關係𠊎个記載已經應驗等了。」
38學生講：「主啊，你看，這位有兩支刀仔。」
耶穌講：「罅了！」
耶穌在橄欖山祈禱(馬太 26:36-46；馬可 14:32-42)39耶穌出城，照常去橄欖山；學生也跈等佢去。
40到該所在，耶穌對佢等講：「你等愛祈禱，免得陷落迷惑。」
41然後，耶穌離開佢等，約有㧹一隻石頭恁遠，跪下去祈禱，
42講：「阿爸啊，你若係肯，請將這個苦杯徙走；總係，毋好照𠊎个意思，愛成全你个旨意。」
43有一個天使對天頂向佢顯現，來加添佢个力量。
44在極痛苦之中，耶穌還較迫切祈禱；佢个汗水像大點个血滴等落地泥。
45祈禱後，耶穌䟘起來，轉到學生該位，發現佢等憂傷過度就睡掉去。
46佢對佢等講：「你等做麼介睡掉去呢？䟘起來，愛祈禱，免得陷落迷惑。」
耶穌被人捉去(馬太 26:47-56；馬可 14:43-50；約翰 18:2-11)47耶穌還講等話个時，有一群人來到。十二個學生中个猶大在頭前帶路，佢進前愛唚耶穌。
48耶穌對佢講：「猶大，你用唚𠊎來出賣人子係麼？」
49同耶穌共下个學生看到這個情形，就講：「主啊，𠊎等做得使刀仔麼？」
50其中一個挷出刀仔，對大祭司个僕人劈過去，削掉佢右片个耳公。
51耶穌講：「莫再動手！」跈等，佢伸手摸該人个耳公，醫好佢。
52然後，耶穌對該兜來捉佢个祭司長、聖殿个警衛長，㧯長老講：「你等帶等刀仔㧯棍仔出來捉𠊎，看𠊎做強盜係麼？
53𠊎逐日同你等共下在聖殿肚，你等並無下手捉𠊎；總係，這下係你等橫行个時節，烏暗掌權了。」
彼得毋認耶穌(馬太 26:57-58，69-75；馬可 14:53-54，66-72；約翰 18:12-18，25-27)54佢等捉等耶穌，帶佢去大祭司个屋肚；彼得遠遠跈等去。
55佢等在庭院肚起一堆火，大家圍等火坐等，彼得也坐在佢等中間。
56有一個使女看到彼得坐在該位焙火，就注目看等佢，講：「這個人也係同佢共下个。」
57 彼得否認講：「婦人家，𠊎毋識佢！」
58過無幾久，又有人注意到佢，講：「你乜係佢等當中个一個。」
彼得講：「先生，𠊎毋係！」
59差毋多一點鐘後，另外有一個人用堅定个口氣講：「絕對毋會差，佢乜係同該人共下个，因為佢係加利利人！」
60總係彼得講：「你這個人啊，𠊎毋知你講麼介！」
佢个話還吂講煞，雞仔就啼。
61主轉身，注目看彼得；彼得正想起主對佢所講个話：「今晡日雞仔啼以前，你會三擺毋認𠊎。」
62彼得就走出去，噭到非常傷心。
耶穌被人㩢耍並侮辱(馬太 26:67-68；馬可 14:65)63掌耶穌个人㩢耍佢，打佢；
64揞等佢个目珠，問佢講：「先知啊，試揣看，係麼人打你？」
65佢等又講盡多話來侮辱佢。
耶穌在議會受審判(馬太 26:59-66；馬可 14:55-64；約翰 18:19-24)66天光个時，猶太人个長老、祭司長，㧯經學教師全部聚集共下，然後帶耶穌到佢等个議會去。
67佢等問佢講：「㧯𠊎等講，你係毋係基督？」
佢應講：「𠊎就係㧯你等講，你等也毋會相信；
68若係𠊎問你等，你等乜會毋回答。
69總係，從今以後，人子愛坐在全能上帝个右片。」
70大家講：「恁樣，你係上帝个孻仔囉？」
耶穌講：「𠊎係，這係你等講个！」
71佢等就講：「𠊎等敢還愛使其他个證據呢？𠊎等已經聽到佢親口講个話了！」
Who We AreWhat We EelieveWhat We Do
2025 by iamachristian.org,Inc All rights reserved.
