馬太 9 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

耶穌醫好癱風病人(馬可 2:1-12；路加 5:17-26)

1耶穌上船，渡過湖，轉到自家个城。

2黏時有人用門枋扛等一個癱風病人來佢个面前。耶穌看出佢等个信心，就對癱風病人講：「細子啊，安心，你个罪得到赦免了！」

3有幾個經學教師心中想：「這個人講侮辱上帝个話！」

4耶穌知佢等想麼介，就問講：「你等樣般心懷惡念呢？

5對這個人講：『你个罪得到赦免』容易呢？抑係講：『䟘起來行』較容易呢？

6這下𠊎愛對你等證明，人子在地上有赦罪个權柄。」就對癱風病人講：「䟘起來，擎你个門枋轉去屋下！」

7該人就䟘起來，轉去厥屋下。

8眾人一看到就著驚；佢等又頌讚上帝，因為佢賜給人這種个權柄。

馬太蒙召(馬可 2:13-17；路加 5:27-32)

9耶穌離開該位向前行，看到一個稅務員，名安到馬太，坐在稅關。耶穌對佢講：「來跈𠊎！」馬太就䟘起來跈佢。

10耶穌在馬太屋下食飯个時，盡多稅務員㧯無守教規个人也來；佢等同耶穌㧯厥學生共下食飯。

11有兜法利賽人看到，就對耶穌个學生講：「你等个先生樣般同稅棍㧯壞人共下食飯呢？」

12耶穌聽到這個話，就講：「健康个人毋使醫生，有病个人正愛。

13聖經講：『𠊎所愛个係慈悲，毋係獻祭。』你等去研究看這句話个意思！因為𠊎來个目的毋係愛呼召義人，係愛呼召罪人。」

禁食个問題(馬可 2:18-22；路加 5:33-39)

14有一擺，施洗約翰个學生來問耶穌講：「𠊎等㧯法利賽人常常禁食，你个學生無禁食，係為到麼介呢？」

15耶穌應講：「新郎還在婚姻个筵席中，人客敢愛使傷心嗎？當然毋使。總係時間會到，新郎會被人對佢等當中帶走，該時佢等就愛禁食。

16「無人用新布補舊衫，因為新補个布會扯裂衫，使爛孔還較大。

17也無人將新酒裝在舊皮袋肚；若係恁樣，皮袋會裂開，酒會漏出來，連皮袋也壞掉去。愛將新酒裝在新皮袋肚；恁樣，兩樣就得到保全。」

會堂管理員个妹仔㧯血漏个婦人家(馬可 5:21-43；路加 8:40-56)

18耶穌正對佢等講這兜話个時，有一個會堂个管理員來見佢，在佢面前跪落去，講：「吾妹仔堵堵過身，求你來去為姖按手，姖就會返生過來。」

19耶穌就䟘起來，跈佢去；耶穌个學生也共下去。

20有一個婦人家，發血漏病十二年；姖行到耶穌个後背，摸佢个衫尾。

21姖心肝想：「𠊎只有摸到佢个衫，一定會得到醫好。」

22耶穌轉身，看到姖，就對姖講：「妹仔啊，安心，你个信心救到你了！」對該時，這婦人家个病就好了。

23耶穌來到該管理員个屋下，看到吹笛仔个㧯亂吵吵个人群，

24就對佢等講：「你等全部出去，這細阿妹仔並無死，係睡掉定定！」

大家就笑佢。

25將該兜人逐出去以後，耶穌入細阿妹仔个間肚，牽等姖个手，姖就䟘起來。

26這消息就傳遍該所在。

醫好兩個瞙目个

27耶穌離開該所在，又向前行。有兩個瞙目个人跈等佢，喊講：「大衛个子孫啊，可憐𠊎等！」

28耶穌入去屋肚，兩個瞙目个來到佢面前，佢就問佢等講：「你等相信𠊎有能力做這件事嗎？」

佢等講：「主啊，𠊎等信。」

29所以，耶穌摸佢等个目珠，講：「照你等个信心成全你等！」

30佢等个目珠就好了。耶穌嚴嚴吩咐佢等講：「毋好對別人講起這件事！」

31總係，佢等一出去，就將耶穌个名聲傳遍該地方。

醫好啞仔

32佢等出去个時，有人帶一個被鬼附身个啞仔來耶穌面前。

33鬼一逐出去，該人就出聲講話。大家盡著驚，講：「在以色列，𠊎等吂識看過恁樣个事。」

34總係，法利賽人講：「佢係靠鬼王來逐鬼个。」

耶穌痛惜人民

35耶穌行遍各鄉鎮，在逐個會堂教訓人，宣傳天國个福音，又醫好各種个病。

36佢看到一群一群个人，就憐憫佢等，因為佢等盡艱苦、無人照顧，像無牧人个羊群共樣。

37所以，佢對學生講：「愛收成个盡多，總係收割个人忒少。

38你等愛祈求田主加派工人來收割。」