1上主講：
巴比倫啊，下來！
對你个寶座頂下來！
坐在地面个塵灰頂。
頭擺你像吂出嫁个細妹仔，
係無人佔領過个城。
總係，人毋會再講你係溫柔幼秀个；
你已經成做人个奴才！
2你愛㩳磨石，磨麵粉！
拿掉面紗！
拉起長裙，露出腳髀來過河壩 ！
3人會看到你赤身露體，
看到你个見笑。
𠊎愛報復；
無人能阻擋𠊎。
4 以色列神聖个上帝救贖𠊎等；
佢个名係上主 — 萬軍个元帥！
5上主對巴比倫講：
不准你出聲，去坐在烏暗中！
毋會再有人稱你做「萬國个王后」。
6𠊎識對𠊎个子民發譴，
使𠊎个產業受侮辱。
𠊎識將佢等交在你个手中；
你對佢等全無憐憫，
連老人家你也將盡重个擔頭放在佢等身項。
7你恅到做得永遠做王后，
無將這兜事放在心上，
也無想這兜事个結局。
8你這好享樂个人啊，這下愛聽𠊎講！
你恅到你个地位堅固；
你認為自家㧯上帝共樣偉大，
你恅到無人奈得你何。
你講自家毋會成做寡婦，
也毋會喪掉子女。
9無想到，有一日忽然間，
這兩樣事全部會發生。
無論你用麼介邪術，
樣般畫符唸咒，
你還係會死子女、做寡婦！
10你當有自信，亂來亂做，
恅到無人看到你做壞事。
你被自家个聰明㧯智識害到。
你認為自家㧯上帝共樣偉大，
你恅到無人奈得你何。
11總係，災禍會降到你身上了，
邪術救你毋到；
災難會臨到你頭那頂了，
你唸咒也無法度消災。
你無想到个時，毀滅忽然間會臨到！
12做你繼續用邪術啊！
做你繼續畫符唸咒啊！
你對後生个時就用慣了，
可能這兜對你還有用，
做得拿來嚇你个仇敵。
13你做恁多个計劃係加痶定定；
俾該兜看天象㧯星宿个來救你較贏哪！
佢等敢毋係在逐隻月頭向你報告，㧯你講會發生个事？
14看啊，佢等會像禾稈恁樣，
一陣火就燒淨淨。
佢等連自家也救毋到；
這火絕對毋係像焙燒个火炭火，
也毋係人做得坐在堘頭个細火。
15你一生人偎靠星象家个計謀；
佢等反轉害你行死路。
佢等隨人尋出路走了，
一個也無留下來救你。
Who We AreWhat We EelieveWhat We Do
2025 by iamachristian.org,Inc All rights reserved.
