1 以色列所有个人全部到希伯崙來見大衛，對佢講：「𠊎等係你个骨肉之親。
2以前，在掃羅還做王个時，你就已經帶領以色列人民出入戰場。上主 — 你个上帝識應許你講：『你愛做牧人領導𠊎个子民以色列，做佢等个統治者。』」
3所有以色列个長老全部到希伯崙見大衛王。大衛在上主面前㧯佢等立約，佢等就膏油設立佢做以色列个王，就像上主通過撒母耳所應許个。
4 大衛王㧯所有个以色列人去攻打耶路撒冷 (該時安到耶布斯)，該地个人民耶布斯人還住在該位。
5耶布斯人講大衛永遠無法度入城，總係大衛還係佔領佢等个錫安城堡，對恁樣這所在就安到大衛城。
6大衛講：「麼人先㓾死耶布斯人，就愛做軍隊个元帥！」洗璐雅个孻仔約押最先攻上去，所以佢就做元帥。
7大衛住在城堡，所以這城堡就安到大衛城。
8大衛重建這城个牆，對山東片坉平个台地 開始整，約押整城个其他部份。
9大衛个王國一日比一日興旺，因為上主 — 萬軍个元帥㧯佢共下。
大衛个勇士(撒母耳記下 23:8-39)10下背係大衛手下有名勇士个名單。佢等㧯其他个以色列人膏油立大衛做王，就像上主所應許个；幫助大衛堅固王國个也係佢等。
11第一個係哈革摩尼宗族个雅朔班。佢係「三勇士」个領袖。佢識在一擺戰爭中用槍刺死三百人。
12「三勇士」个第二個係亞合族人朵多个孻仔以利亞撒。
13在巴斯‧達閔戰爭中，佢㧯大衛共下抵抗非利士人。以色列人逃走个時，佢堵好在一垤大麥田肚，
14帶領部下保護該垤田，㓾掉當多非利士人。上主使佢大大勝利。
15一隊非利士人安營在利乏音山壢肚个時，有一日，「三十勇士」當中有三儕下到亞杜蘭山窿附近个磐石該位去見大衛。
16該時，大衛在一個有防衛个山頭；一群非利士人佔領伯利恆。
17大衛想念家鄉，就講：「𠊎當想愛啉伯利恆城門堘个井水啊！」
18該三個勇士就闖等過非利士人个營地，到伯利恆城門堘个井打水，帶轉來給大衛。總係大衛毋肯啉，反轉將水倒出來獻給上主。
19佢講：「上帝啊，𠊎樣般做得啉這水！這就係啉冒生命危險去打水个勇士个血！」所以大衛毋啉。這就係該三個勇士勇敢个行為。
20 約押个老弟亞比篩係「三十勇士」个領袖。佢識用槍刺死三百人，所以㧯「三勇士」共樣出名。
21佢係「三十勇士」當中最傑出个一個，成做佢等个領袖，總係比毋得「三勇士」个名聲。
22 甲薛人耶何耶大个孻仔比拿雅係另外一個出名个勇士。佢有當多勇敢个行為，包含㓾死兩個強壯个摩押戰士 。有一擺落雪天，佢下到大窟肚，打死一隻獅仔。
23佢又㓾死一個強壯个埃及人；該人兩百零公分高，手項拿等長槍，槍柄像織布機个車心恁粗。比拿雅只有拿等一支棍仔㧯佢拚，將佢手項个槍搶過來，用該槍將佢㓾死。
24這係耶何耶大个孻仔比拿雅勇敢个行為；佢㧯「三勇士」也盡出名。
25佢在「三十勇士」當中最受人尊重，總係㧯「三勇士」个名聲還係比毋得。大衛派佢做侍衛長。
26-47以下係其他个勇士：
約押个老弟亞撒黑，
伯利恆人朵多个孻仔伊勒哈難，
哈律人沙瑪，
比倫人希利斯，
提哥亞人益吉个孻仔以拉，
亞拿突人亞比以謝，
戶沙人西比該，
亞合人以來，
尼陀法人瑪哈萊，
尼陀法人巴拿个孻仔希立，
便雅憫族、基比亞人利拜个孻仔以太，
比拉頓人比拿雅，
迦實谷人戶萊，
亞拉巴人亞比，
巴魯米人押斯瑪弗，
沙本人以利雅哈巴，
基孫人哈深
，哈拉人沙基个孻仔約拿單，
哈拉人沙甲个孻仔亞希暗，
吾珥个孻仔以利法勒，
米基拉人希弗，
比倫人亞希雅，
迦密人希斯羅，
伊斯拜个孻仔拿萊，
拿單个兄弟約珥，
哈基利个孻仔彌伯哈，
亞捫人洗勒，
比錄人拿哈萊 (佢係代洗璐雅个孻仔約押拿武器个人)，
以帖人以拉，
以帖人迦立，
赫人烏利亞，
亞萊个孻仔撒拔，
示撒个孻仔亞第拿 (佢係呂便支族中一個族長，佢帶領三十個戰士)，
瑪迦个孻仔哈難，
彌特尼人約沙法，
亞施他拉人烏西亞，
亞羅珥人何坦个孻仔沙瑪㧯耶利，
提洗人申利个孻仔耶疊㧯約哈，
瑪哈未人以利業，
伊利拿安个孻仔耶利拜㧯約沙未雅，
摩押人伊特瑪，
以利業，俄備得，㧯鎖巴人 雅西業。
Who We AreWhat We EelieveWhat We Do
2025 by iamachristian.org,Inc All rights reserved.
