1上主對耶利米講：
2「你䟘起來，到該燒缶師傅个屋下去；在該位𠊎有話吩咐你。」
3所以𠊎到燒缶師傅个屋下去。𠊎看到佢堵堵轉等輪盤在該位做事。
4佢用泥做缶仔，做壞掉个時，佢就用該垤泥做別个用品，完全照自家个意思去做。
5後來，上主又對𠊎講：
6「敢講𠊎做毋得照燒缶師傅个方法來對待你等以色列人係麼？你等在𠊎手中就像泥在燒缶師傅个手中。
7無論麼介時節，𠊎宣佈愛挷出，拆掉，抑係毀滅一個國家，
8若係該國家離開罪惡，𠊎就會回心轉意，毋降災難。
9無論麼介時節，𠊎宣佈愛栽種，建立一個國家，
10若係該國家毋服從𠊎，專門做壞事，𠊎就會改變心意，毋將𠊎所講个福氣賜給佢等。
11所以，你愛恁樣㧯猶大並耶路撒冷个人民講：𠊎計劃愛降災禍攻打佢等，準備愛責罰佢等。你愛勸佢等毋好再做壞事，逐儕愛遽遽改正自家个所做。
12總係佢等會講：『毋使加講！𠊎等樣愛使改過？𠊎等愛照自家个意思，照自家硬頸个本性做壞事。』」
以色列人拒絕上主13所以，上主恁樣講：
你等去問各國看，
有麼人聽過恁樣个事呢？
𠊎所惜个以色列人民做一件非常可惡个事。
14 黎巴嫩巖石頂个雪識溶掉麼？
山頂流下來清涼个水識燥掉麼？
15總係，𠊎个子民毋記得𠊎；
佢等向虛假个偶像燒香。
佢等在所行个路項跌倒，
毋肯再行該條舊路；
佢等去行吂整好个細路。
16佢等將這垤土地變做荒涼、得人驚个所在，
永遠被人看毋起；
過路人看到定著會嚇倒、緊搖頭。
17𠊎愛在敵人面前逐𠊎个子民走，
像東風吹散塵灰。
災難來到个時，
𠊎愛背向佢等，毋係面向佢等。
謀害耶利米18然後人民講：「來啊，𠊎等來設計對付耶利米！隨時乜有祭司來教導𠊎等，有智慧个人來幫助𠊎等，有先知來傳講上帝个信息。𠊎等講話來攻擊耶利米，毋好再聽佢个話。」
19因為恁樣，𠊎祈禱：「上主啊，求你聽𠊎个報告，也聽𠊎敵人控告𠊎个話。
20好心無好報，係麼？若無，佢等樣會挖陷阱來害𠊎啊！求你想看仔，𠊎在你面前為佢等求過；𠊎識求你毋好在大發譴中來對付佢等。
21這下愛樣般正好？上主啊，𠊎求你：俾佢等个子女餓死；俾佢等戰死；俾佢等个婦人家死老公、子女夭折；俾佢等个壯丁發瘟來死，後生人死在戰場。
22求你派土匪忽然間來到，搶劫佢等个家園，使佢等著驚盡嘶；因為佢等挖陷阱愛害𠊎，張羅網愛捉𠊎。
23上主啊，佢等想愛㓾𠊎个陰謀，你盡清楚。求你毋好赦免佢等所做个壞事，毋好塗掉佢等个罪過。求你使佢等在你面前跌倒；求你在大發譴時來責罰佢等。」
Who We AreWhat We EelieveWhat We Do
2025 by iamachristian.org,Inc All rights reserved.
