詩篇 76 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

得勝个主上帝 亞薩个詩歌，交給聖歌隊長，用絲弦个樂器。

1上帝在猶大，逐個人認識佢；

在以色列，人人尊重佢个名。

2佢在耶路撒冷有聖帳篷；

佢在錫安山有住个所在。

3在該位，佢拗斷弓箭，

毀壞盾牌、刀劍㧯武器。

4上帝啊，你實在真光榮！

你打贏敵人，對群山轉來个時，實在真威嚴！

5佢等个勇士所搶到个，又被人搶走；

佢等个戰士睡到死死，無力好抵抗。

6 雅各个上帝啊，你咄一聲，

佢等个馬㧯騎兵就斷氣。

7上帝啊，只有你係得人敬畏个！

你一發譴，麼人在你面前企得住呢？

8-9你對天頂宣佈判決；

你䟘起來施行審判，

愛拯救一切受壓迫个人，

該時全地敬畏，毋敢出聲。

10人个憤怒會變做對你个頌讚；

你會平伏賸下來个怒氣。

11愛對上主 — 你等个上帝許願，並愛還願；

鄰國也攏總愛前來進貢，敬拜可畏个主。

12佢滅該兜王子个威風；

佢使地上个君王著驚。