1你等在耶路撒冷个街巷行來行去，
詳細查看，去廣場尋看仔哪，
看尋得到一個行正義、追求誠實个人麼？
你等若尋得到，
𠊎就赦免耶路撒冷。
2佢等雖然指等永生个上主發誓，
總係所發个誓係假个。
3上主啊，你敢毋係愛尋看有誠實个人無？
你打佢等，佢等無反應，
你責罰佢等，佢等也毋接受管教。
佢等頸筋比石頭較硬，毋肯悔改。
4所以𠊎想：
佢等係窮苦又戇檔个人民；
佢等毋知上主个道路，
毋知上帝个法則。
5𠊎愛來去見佢等个領袖，㧯佢等講看仔；
佢等一定知上主个道路，
㧯上帝个法則。
總係佢等攏總將軛拗斷，
將索仔挷掉，毋肯順服。
6所以，獅仔會對樹林出來攻擊佢等；
豺狼會對曠野出來殺害佢等；
豹仔會在城市周圍伏等等機會；
麼人出去，就會被牠擘碎。
因為佢等一擺又一擺悖逆上帝；
佢等个罪惡當多。
7上主講：
𠊎做麼介愛赦免你等？
你等个子女已經悖逆𠊎去拜假神。
𠊎俾佢等食飽，
佢等卻去犯姦淫，
歸群去尋妓女。
8佢等就像食到飽飽个馬仔當雄頭、發嘶聲，
逐儕當想愛去拐鄰舍个𡜵娘。
9𠊎敢無應該為這兜事責罰佢等嗎？
像恁樣个國家，𠊎敢毋使親自報復嗎？
10𠊎愛命令敵人講：
「你等進入𠊎子民个葡萄園，去毀壞它，
總係毋好全部打壞淨淨。
你等愛斬掉葡萄樹个枝仔，
因為這兜毋係屬上主个。」
11 以色列人㧯猶大人攏總對𠊎非常無忠心。
𠊎 — 上主恁樣宣佈了。
上主㧒掉以色列12上主个子民毋承認上主。佢等講：「上主㧯𠊎等無關係 。𠊎等毋會堵到災難、戰亂抑係飢荒。」
13佢等又講：「先知个話當肨風；毋係上主个道；願佢等个話實現在佢等自家身上。」
14所以主上帝 — 萬軍个元帥恁樣對𠊎講：「耶利米啊，這兜人既然講這種話，𠊎愛將𠊎个話放在你口中。𠊎个話像火，佢等像柴；火愛將佢等燒淨淨。」
15上主講：「以色列人啊，𠊎愛使一個國家對遠遠个所在來攻打你等。這個國家當強，也有當久个歷史；佢等講个話你等聽毋識，也毋了解。
16佢等全部像勇敢个戰士，佢等个箭袋像係嘴開開个墳墓。
17佢等會食掉你等个五榖、糧食；佢等會㓾死你等个子女、你等个牛羊；佢等會食淨你等个葡萄㧯無花果。佢等个軍隊會拆掉你等所偎靠个城堡。」
18上主講：「就係在該時，𠊎也毋會將𠊎个子民全部消滅。
19耶利米啊，若係佢等問起：『上主 — 𠊎等个上帝做麼介恁樣對待𠊎等？』你愛㧯佢等講，因為佢等離開𠊎，在自家个國家服事別國个神明，所以佢等會在外國服事外國人。」
上帝警告佢个子民20上主講：「愛通知雅各个後代，在猶大宣佈講：
21你等戇檔毋知頭天个人啊，愛注意聽！你等有目珠總係毋會看；有耳公總係毋會聽！
22𠊎係上主。你等做麼介毋敬畏𠊎？在𠊎面前，做麼介無愊愊掣？𠊎用沙灘做大海永遠个界限，大海就毋敢超過這界限。海水盡沖也毋敢𨃟過；大浪翻滾也毋敢越過。
23總係你這兜人硬頸又悖逆！你等悖逆𠊎、離開𠊎。
24雖然𠊎照時節賜給你等春雨秋雨，使你等到時就有好收成，總係你等從來毋識敬畏𠊎 — 上主你等个上帝。
25你等个罪惡使你等無風調雨順；你等个罪過害你等得毋到福氣。
26「在𠊎子民个當中有壞人。佢等設詭計陷害人，就像捉鳥仔个人安羅網。
27佢等个屋下充滿用詭詐㩢來个東西，就像獵人个籠仔裝滿鳥仔。所以，佢等有錢有勢，
28紅光滿面又盡大箍。佢等壞事做盡，毋為孤兒伸冤，毋代窮苦人主持公道。
29「所以，𠊎 — 上主愛親身為這兜事責罰佢等；𠊎愛使恁樣个國家受到報應。
30這隻國家樣般會發生恁得人驚、恁可惡个事！
31該兜先知所講个攏總係假預言；該兜祭司專門為自家爭權奪利；𠊎个子民也歡喜恁樣！到𠊎責罰該日，佢等愛樣般好呢？」
Who We AreWhat We EelieveWhat We Do
2025 by iamachristian.org,Inc All rights reserved.
