1上主又㧯𠊎講：「就算摩西㧯撒母耳企在𠊎面前求𠊎，𠊎也毋憐憫這兜人。對𠊎面前將佢等逐走！喊佢等走開！
2若係佢等問，佢等愛走到㖠位去，你愛㧯佢等講，上主恁樣講：
應該病死个，就病死！
應該戰死个，就戰死！
應該餓死个，就餓死！
應該被人捉走个，就被人捉走！
3「𠊎 — 上主決定使佢等受四種災害：被刀劍㓾死；身屍被野狗拖走；被天空个飛鳥並地上个野獸吞食、滅屍。
4因為猶大王希西家个孻仔瑪拿西在耶路撒冷个所做，𠊎愛使天下萬國个人一看到佢等就惱到會死。」
5上主講：
耶路撒冷人啊，麼人會可憐你等？
麼人會為你等悲傷？
麼人會轉身來向你等問安？
6你等豁掉𠊎；
你等翻轉身去毋插𠊎。
所以𠊎愛伸手毀滅你等；
𠊎無愛繼續憐憫你等。
7𠊎愛在國內逐隻城市个門口，
像用簸箕恁樣將你等簸出去。
𠊎个子民啊，𠊎愛消滅你等；
𠊎愛㓾你等个子女，
因為你等還毋悔改；
8你等个𡜵娘變寡婦个會比海沙較多。
𠊎㓾死強壯个後生人，
打擊佢等个阿姆。
𠊎愛使痛苦㧯著驚忽然間臨到姖等。
9該喪掉七個子女个阿姆昏掉，
強強氣會斷掉；
姖个希望像當晝頭个日頭忽然落山，
姖受羞辱，失望見笑。
𠊎愛使姖等个敵人將賸到个人㓾淨淨。
𠊎 — 上主恁樣宣佈了。
耶利米向上主埋怨10𠊎今就慘了！吾姆做麼介𫱔𠊎？害𠊎愛㧯國內所有个人冤家！𠊎無借錢給別人，也無向別人借錢，總係逐儕都咒罵𠊎。
11上主啊，若係𠊎無盡責任事奉你，若係𠊎个敵人堵到困苦个時，𠊎無代佢等祈求，就由在佢等个咒罵實現！
12(無人拗得斷鐵棍，特別係對北方來个摻銅鐵棍。)
13上主對𠊎講：「為到𠊎子民在全國逐所在所犯个罪，𠊎愛使佢等个財寶白白被人搶走。
14𠊎愛使佢等到生份个所在去做敵人个奴才；因為𠊎發譴到火當著，愛將佢等燒掉。」
15然後𠊎講：「上主啊，麼介你都知。求你紀念𠊎，幫助𠊎，向迫害𠊎个人報仇！求你毋好忍等毋發譴；毋好俾佢等有機會㓾𠊎。你愛知，𠊎受侮辱係為到你个緣故。
16主上帝 — 萬軍个元帥啊，你啟示个話係𠊎心靈个糧食，你个話使𠊎心充滿喜樂，因為𠊎係屬你个。
17𠊎無去坐在享樂人个會中共下鬧熱歡笑。因為順從你个帶領，𠊎孤單坐等；你使𠊎充滿受氣。
18𠊎做麼介一直受苦？做麼介𠊎个傷口無得到醫治？敢講你對待𠊎像會騙人个細河壩，一下有水一下無水，倚恃毋得？」
19上主恁樣應𠊎講：「若係你倒轉來，𠊎會收留你，使你重新做𠊎个僕人。若係你毋加講話，單單傳講有價值个信息，你就做得做𠊎个代言人。人民會歸向你；你毋好去順佢等。
20𠊎愛使你在群眾面前像堅固个銅牆鐵壁。佢等攻擊你，總係無辦法贏過你。𠊎愛㧯你共下，拯救你，保護你。
21𠊎愛對強暴个壞人手中將你救出來。𠊎 — 上主恁樣宣佈了。」
Who We AreWhat We EelieveWhat We Do
2025 by iamachristian.org,Inc All rights reserved.
